熊貓專一至死....不理如何傷悲...........何解會唱起歌上來? 皆因黎到呢間以熊貓做主題佈置既甜品屋, 真係不禁要講句: 熊貓.......全部都係熊貓.......... 店舖面積骨子, 裝飾全部以熊貓做主題 熊貓當然唔食得, 要望下餐牌有咩好食先? 侍應問我食唔食榴槤? 我答....至愛呀, 佢就推介我食呢款榴槤飄香椰皇($48) 原個椰皇作容器, 裏面包括有清香椰皇凍, 透明質地, 食落清甜好香椰味, 滑嘟嘟好似食緊啫喱咁, 面頭伴以一球榴槤肉, 食落果肉味濃郁, 質感又棉又滑, 超正呀 友人唔食榴槤, 佢當然另叫一款岩晒呢輪秋冬天氣日子食既椰皇南北杏木瓜雪耳($32), 有熱有凍選擇, 熱食會更滋味D 材料"釀"滿左係個椰皇入面, 甜美既木瓜粒配以爽口既雪耳, 偶然又會食到南北杏, 糖水甜度適中, 友人表示食完喉嚨舒服晒, 個人即時覺得無咁DRY...............哈! 見到餐牌有吐司, 我地兩個無需商量, 一致決定要食, 咁就叫埋呢款小熊朱古力蜂蜜吐司伴雪糕($48), 賣相相當有份量, 可以自選雪糕球味道, 香脆多士上淋上朱古力及吉士醬, 底層有蜂蜜, 三者增加左香甜味! 仲有一塊熊貓曲奇作裝飾, 我地當然唔會留佢"活口"啦.............. 識食當然係以雪糕加吐司一齊食, 口感層次豐富晒, 非常好味 甜品價錢唔貴, 味道唔錯, 去開附近既都會再去食呀! 熊貓甜品屋: 佐敦偉晴街81至87號地下B舖 contact me : gingerszeto@yahoo.com.hk
