之前睇過其他人嘅遊記，發現入古城喺要收入場費，但係選擇性收費，即係如果見你似水魚，佢就會截停你，叫你比錢。相對上，華人被截停嘅機會喺大過西方人的，但其實入會安有好多條路，只要你識搵就可以避開佢哋無理嘅收費。由於報咗烹飪課嘅關係，直接由當地人載我哋入城，完美避開收費站。 學完煮飯之後，就開始慢遊古城啦。 越南嘅建築物最吸引我，因為真係可以睇到、嗅到、感受到歷史嘅痕跡。 大概半日時間就可以行完古城，街上有好多買手工藝品嘅小店，但其實開始好商業化，如果要買野，難免要講下價，但由於廢青太廢嘅關係，真係連講都廢事，所以行咗一個圈之後，就開始去蒲Cafe啦。 呢間Tea House個名叫Reaching Out，係同我哋一齊煮野食嘅美國夫婦介紹，裏面嘅店員都喺有聽障問題，所以只可以用身體語言或者文字同佢哋溝通，大家可以喺裏面搵返失去已久嘅寧靜。 我哋可以喺牆上睇到＂Enjoy the Silence＂以及＂Calm Down with A Cup of Tea＂嘅字句。 主要賣茶同手工曲奇，而佢哋用嘅器皿都非常有特色。 我哋點咗烏龍茶、冰滴咖啡仲有熱情果味曲奇，廢青表示飲品非常出色，曲奇則一般。檯上放有紙筆以及寫有單字嘅木塊，例如「Thank You 、Question、Bill、Cold Water」等等，顧客有需要嘅時候就可以用呢啲方法同店員交流，睇得出喺一間好用心的嘅企業，但喺香港卻少有呢種將心比心嘅體驗，認真灰咗一下。
