廢青為咗唔想自己變得太廢，所以喺出發前就搵定烹飪課，好等自己有一技旁身，最後就揀咗去會安（ Hội An）上堂，順便遊下古城。 其實唔少酒店都會有Shuttle Bus 去會安，價錢間間都唔同，有啲酒店係免費，咁當然佢已經反映咗落去房價入面啦。由於兩條廢青報咗10點鐘上烹飪課，避免遲到，我地揀咗佢哋提供嘅接送服務，直接去酒店載我哋，當然世界喺無免費午餐，盛惠14美金一程。 第二日朝早9點，司機準時喺酒店出現，車程大約40分鐘，到會安後，隨即去街市會合導師同另外兩組學員，分別係一對美國新婚夫婦同一對巴黎戀人。 上堂前，導師會帶我哋去行下街市兼買埋陣間要用嘅食材，旅程最精彩莫過於可以融入或體驗當地人嘅生活。越南嘅街市比我想像較乾淨同有秩序，濕貨、乾貨、肉類、魚類都有自己所屬嘅位置。 喺越南，無論婆婆定嬸嬸，佢哋嘅坐姿都非常豪邁 有一小撮人會直接喺地下擺檔，而當地人都真係幾常戴越南帽。 行咗半個鐘後，導師就帶我哋返去上堂嘅地方，每一組都可以學煮4道菜，我哋同美國夫婦一樣學整越南湯粉（Phở）、越式春卷、越南班戟（Bánh xèo）及香茅辣椒炒雞柳。 越式春卷，好易整，重點係個汁。 越南班戟（Bánh xèo），我認為喺4道菜中最好食的，裏面主要有蝦、豬肉同芽菜，煎得好香脆，但重點仍然喺個汁。 越南湯粉（Phở），因為我哋兩個廢青都唔食牛，所以無整生牛肉湯河，改用雞肉，最花時間係個湯底，用咗一個鐘煮個湯底，我相信用牛骨點都濃郁過用雞骨。 總結係越南菜其實唔難整，個靈魂絕對喺個汁。 煮飯啲空檔時間同美國夫婦交流下，發現佢哋度蜜月中，男方仲要喺出發之前辭職，同老婆去3個月嘅蜜月旅行，主要去東南亞地區，聽完之後兩條廢青表示好羨慕。
