點擊圖片放大 Fabulous Kira不嬲都鍾意食啲熱氣肥嘢，今日收工就同兩個朋友去咗依排好hit嘅iconic H熱狗。其實紅磡對我嚟講有少少遠，所以遲遲都未試到。今日朋友提議一齊去食，好彩結果都無令我哋失望，不枉前後用咗1個鐘去買。 Fabulous Kira今次試咗香辣燒烤腸熱狗加熱溶芝士配蜜糖芥末。先讚啦，個芝士真係好好味，濃度啱啱好，大大塊，但又唔會好溜，真係睇得又食得！而個蜜糖芥末嘅甜味，同芝士同熱狗腸個味道又好match，有加分嘅感覺。仲有個薯笑餅，個名幾搞笑，同埋都幾有口感呀，啖啖薯仔咁。 不過始終都有嘢要彈下嘅，我哋係為個份熱溶芝士而嚟，當然好希望佢仲係熱辣辣嘅時候就送入我哋個口啦，可惜間嘢真係太多人啦，要take away，我哋拎到過POLY U食，其實都變咗硬角角芝士啦，始終見唔到好期待嘅一刻。 另外，綜合埋我啲朋友嘅評語，條熱狗腸真係無咩特別，真係食唔出唔同地方嘅洋腸有咩乾坤。而我嘅香辣燒烤腸都唔香辣，亦唔燒烤。同埋沙律無咩沙律醬，真係食緊菜咁，唔似係沙律，有少少sad。
