去尖沙咀行街,搵晚餐食嘅時候,就好自然令我諗起要食韓國嘢。因為尖沙咀真係佈滿好多唔係韓國人開嘅韓國食肆(好似係),而Fabulous Kira今次就揀咗喺金巴利道嘅漢城美食啦。揀佢其實係有原因嘅,尖沙咀雖然好多韓國嘢,但一啲都唔平囉,格咗幾間食店價後,行到漢城美食,見到佢出面個menu,價錢幾均真,嘢食又幾多選擇,就入咗去啦。間嘢都唔少人架,仲有少少逼嘅feel,而且仲好熱,佢應該都預你速戰速決架啦! 漢城美食落單係好自助嘅,只要將你想食嘅嘢,用代表佢哋嘅number寫喺落單紙上面,再俾staff就代表完成落單架啦!今次Fabulous Kira同朋友兩個人就試咗韓式炒粉絲、韓式紫菜捲、蒸豬肉菜餃子同酸辣炸雞半份,加多罐韓國啤酒。 Fabulous Kira唔係好鍾意食泡菜,但佢個薯仔真係好好味,我應該可以食一隻。韓國啤酒我諗大家喺好多地方都試過,我麻麻啤酒,都唔方便恭維。 本身好期待,應因為想食韓式紫菜捲而走去韓國餐廳,但依個紫菜捲真係令我好失望,唔可以話難食,但真係唔好食囉。可能我先入為主啦,曾經喺珠海拱北地下商場食過一間小店,真心韓國人開,嗰到嘅紫菜捲真係令Fabulous Kira回味無窮。而個韓式炒粉絲都幾好味嘅,但始終都係鹽咗少少,其實我明白度度嘅炒粉絲都係咁,夠「味」先「宗」,但對Fabulous Kira嚟講,真係有少少太重口味啦。 蒸豬肉菜餃子都係餃子咁啦,我唔會覺得太特別,但同枱食飯嘅朋友就覺得好唔錯,味道究竟係咁,等你自己試下先知啦!而個半份酸辣炸雞,隻雞幾有骨感呀,如果再有口感啲,食肉獸Fabulous Kira真係會開心好多。但公道說話係要講嘅,佢個炸雞source係幾好味嘅,咁當然都好熱氣啦,唔好係太多啦!