前排皮膚敏感，擦咗唔少類固醇，又十世無敷mask，無做facial，皮膚乾到核爆，毛孔粗到喊出嚟。屋企囤積咗好耐嘅mask終於可以重出江湖，緊係要出動一塊最迅速見效嘅矜貴靚mask啦。 之前喺屈臣氏做緊K:becos嘅特價，買咗兩塊蝸牛素補濕潤白水晶面膜返屋企，今日終於有機會試到。佢係Gel mask嚟，唔同一般嘅paper mask，更加貼合面形，仲好冰涼舒服。 女人真係會俾護膚品寫到天下無敵嘅描述打動，K:becos蝸牛素補濕潤白水晶面膜當然都同其他mask一樣，講到天上有，地下無啦，但往往我哋都真係要試過，先知邊隻mask係天，邊隻mask係地。 其實我揀mask好鍾意搵啲保濕，聲稱可以令肌膚飽滿潤澤咁。好開心今次無揀錯，敷完K:becos蝸牛素補濕潤白水晶面膜後，要抄廣告講句，皮膚真係水嫩嫩。
