Fabulous Kira不嬲都幾鍾意具有中國傳統特色嘅事物，今次食依間籠太子點心專門店，原因都係因為佢有點點兒咁多多中國傳統風味。每次由旺角或者尖沙嘴返屋企，我搭嘅巴士都總會經過太子柏樹街，依間籠太子個logo夠晒搶眼，令我想試食好耐。 其實單單係太子，都已經有成八間依啲點專門店，到底要點樣先可以突圍而出？對於依種點心專門店，間舖頭話細唔細，但老闆有點兒貪心，擺咗好多位，搞到啲員工行都唔太行到。同埋老闆應該要跟下依家餐廳啲趨勢啦，有唔少舖頭都搞到細細間咁，逼下啲人排下隊，咁先谷到人氣架嘛。好似尋晚咁，有七成位其實都係吉嘅，何必呢？ 但籠太子又原來真心係好嘢嚟架喔，食物水準又真係超出預期，俾返個like你啦。尋晚我同朋友，total兩個人，叫咗六個點心，都唔知係佢啲嘢大份定我哋細食啦，食到好飽。（其實係我哋細食，嘢係份量係正常，廢事誤導你！） 煎蝦膠釀茄子（HKD16）、雪山叉燒包（HKD17） 個茄子就真係茄子咁啦，無咩特別，不過個蝦，又俾佢煎得幾香，食落仲幾爽口喔，個汁亦都幾特別，令人好想係咁點，依到俾你將功補過啦。雪山包其實唔少地方都有得食，我亦知道都唔少人會叫嘅。但我對佢有少少失望啦，個皮無嘢嘅，幾香幾脆，但衰在入面，叉燒同汁都太少啦，食落唔夠豐富，可能我對一個HK6都唔駛嘅包太高要求啦。同埋依個包，抵係抵在食一個已經好包，如果你一個人，叫一碟雪山飽，加埋HKD3茶錢，都係一個唔錯嘅tea set。 柴魚花生粥（HKD16）、油菜（HKD15） 因為Fabulous Kira病病地，而且不嬲都鍾意食柴魚花生粥，所以我覺得好好味。不過你要留意，同行者只係覺得普通架啫，咁你都唔好對個粥咁高要求啦，好少人會放佢做重點嘅。油菜咪油菜咁囉，食嘅時候，令我掛住媽媽煮嘅菜心咁囉。 魚肚水餃（HK18）、名醬蒸鳳爪（HKD16） 水餃Fabulous Kira無得食，唔知咩味，Sor！鳳爪我就食晒成碟，普普通通啦，但都係嗰句，我鍾意食呀！ 鵪鶉蛋燒賣（HKD22）、多汁小籠包（HKD18） 鵪鶉蛋普通咗少少，有啲乾，所以ok失色。個小籠包其實唔係真係咁多汁，但佢叫「多汁小籠包」就令人唔係咁鋸啦。中國人有句話係「唔怕生壞命，最怕改壞名」就係依啲情況！ 籠太子點心專門店的整體評分 味道：7.5/10 服務：8/10 環境：7.5/10 價錢：7.5/10
