人在檳城,若要找地方飲茶既話,我既選擇來來去去嗰幾間,榕檳茶樓是其中之一。由舊舖開始幫襯,幾乎每次遊檳城,都會去拜訪下。今次算好彩,等左十分鐘左右就有位,仲要係大枱 (檳城唔使搭枱),三個人可以坐得舒舒服服食番餐。 跟香港一樣,會俾個兜你洗一洗碗筷,完事後出去睇睇有咩食。 睇岩食乜,同店員講,佢會幫你執。千祈唔好自己摷到人哋啲嘢亂晒呀! 去到邊都好,總覺得要有蝦餃燒賣才是飲茶。檳城既蝦餃,形狀唔算好靚仔,勝在大大粒,非常足料,燒賣面頭放幾粒魚籽,同香港稍有分別,但味道都屬正常。 鳳爪就做得好,不論賣相與味道,若果不說,都幾難分是香港定係馬拉既出品。 排骨沒有一陣雪味,已贏左香港唔少酒樓。 有類似煎釀三寶的東西,茄子大家見慣見熟,釀苦瓜又真係好似未係酒樓食過喎! 最後都吃點甜,蛋撻都好近似,撻皮有夠酥脆,唯獨是蛋香未夠,只是用料可能不及香港靚而已。 埋單時,老板娘話認得我,連我去過舊舖都記得。係咪認錯人呀?!定係我上次無埋單,哈哈~餐廳資料:榕檳茶樓59A, Lebuh Kimberley, George Town, 10100 George Town, Pulau Pinang+60 16-430 6789