據聞復活節有近250萬人離港，我是其中之一，同屋企人去左澳門食下嘢。老媽子去到邊都要飲茶，無問題，上網預訂間中菜廳便是。或許是時間太緊迫，大部份星店如譽龍軒、天頤、紫逸軒等都已爆滿，唯有邊間有位訂邊度，結果來到巴黎軒。 也好，反正我都未有到訪過，一於來場鐵塔下的午餐。 來幾款點心，鮮蝦帶子蟹肉海棠餃，半邊藍色半邊白色，仲有金邊，做得非常細緻，好矜貴。足料是理所當然，沾一點XO醬來伴之，我覺得更吸引。 另一款蒸點，巴黎軒水晶藍蝦餃，大概就是招牌了吧！用上刺身級的藍蝦作餡，我在8餐廳亦曾見識過，質素絕對無庸懷疑。三隻蝦餃做成不同顏色，形狀靚仔，再有金萡作點綴，賣相滿分。三種顏色外皮，味道其實沒甚分別，同埋澄麵皮實在太黏筷子，吃起來不太方便。 天鵝蘿蔔絲酥做得栩栩如生，鵝身既「羽毛」大概是我見過最逼真的。坦白說，質感未算最鬆化，但絕對可接受有餘，加上勁多清甜的蘿蔔絲，也算是有水準的出品。 芋角本身就是我最愛的東西，加隻矜貴既鮑魚係面，令我忍不住點上。然而，是日的鮑魚有少許韌，反而影響左整體既表現。 叉燒腸粉用上西班牙黑毛豬，已經不是什麼新鮮事，重點係加入了日本的青瓜漬，味道帶絲絲酸香，我又幾喜歡。 脆炸杏片百花小棠菜，我會形容為高級版本的鍋貼小棠菜，既保持應有口感，杏片更加鬆化，又沒那麼油，加埋精美既擺盤，值得一試。 老媽子驚唔夠飽，叫碗香濃雞湯手工菠菜拉麵，煙韌既麵條，真正濃郁既雞湯，佢讚不絕口，說是全餐既MVP。 甜品簡簡單單要份紫薯雪媚娘，呢款甜品一定好食，加上其色澤及高貴外型，又怎可能唔滿足。在鐵塔下品嚐賣相一百分既美食，無疑是很高的享受。餐廳資料:巴黎軒澳門巴黎人巴黎鐵塔六樓853 8118 8822
