話說數星期前，跟朋友在中環食完Brunch，佢話想去大館逛逛，順便飲杯咖啡，因而去到了Tozzo。幾喜歡Tozzo的環境，好寫意。我在IG說，若不是當日吃得飽飽，相信我會試下佢既蛋糕，同埋Gelato。此言一出，即有另一位朋友相約，傾下傾下，演變成復活節的七人飯聚。 假日並沒有套餐，不打緊，散點便是。各人選自己心水的，喜歡的就分甘同味。我揀既係龍蝦包，蠻多的龍蝦肉，結合沙律醬，少許西芹粒作點綴，吃起來清新開胃，層次唔錯。伴上的薯條也好。 試了半份雞肉三文治，包身帶脆，雞扒皮脆肉不粗嚡，配點高麗菜及番茄，健康得來亦不失美味。聽說漢堡味道都不俗，但溫度可以多加留意。 紅酒燉牛頰肉是大家一致讚好的菜色，燉至非常腍身鬆化，完全不像是在Cafe能吃到的優質出品。 接下來是幾款蛋糕，以及Gelato。賣相全部都好靚，出品集不同國家之原素，如Hibiscus Matcha Tart帶著日式風味，輕怡的Kaya & Coconut Maritozzzo充滿星馬特質，朱古力拿破崙十分精緻。 然而，我最喜歡的一款，係其吉祥物Tozzo。這其實是芝士蛋糕，外型好得意，看賣相以為外層好甜，吃起來又不是，加上軟滑的芝士，很好吃。能成為店家的吉祥物，不無道理。愛喝咖啡愛喝酒的，統統可以滿足到，這個下午，是久違了的悠然快樂。餐廳資料:Tozzo 中環荷李活道10號大館21座賽馬會藝方2樓
