朋友K去完旅行，約大家出來食飯兼派手信，我梗係會出席。佢食過大角咀既喜聚坊，讚到天上有地下無，好想翻兜，問各位有無興趣，結果當然是一呼百應，我就二仔底死跟。店子貼滿大廚寶哥與名人明星的合照，據聞佢師傅鄺炳均好猛料，做過兩任港督御廚等等... 而寶哥就師承鄺師傅既手藝，做到一系列的所謂失傳美食。 由於大部份招牌菜式需要預訂，那就勞煩朋友K打點好，我哋一干人等依時出席就是。 先來每人一隻冰鎮鮑魚，我起初是有擔心會好韌，事實証明我是杞人憂天，鮑魚十分之軟腍入味，配上黑椒、蒜茸等等打造而成的汁醬，冰涼醒胃，是個很合適的冷盤。 煙燻鷹倉，兩斤半重，肯定是好東西，說起來已許多年沒吃過鷹倉了。端上來時，煙韌香氣陣陣，非常吸引。皮香肉厚，肉質結實但保持到唔嚡口，魚味濃郁，的確好食。當然，呢條魚身價不菲。 一系列手工菜式都做得有辦有眼，隻雞自然難唔到寶哥，肉嫩好吃。 再來邪惡到一個點的手工菜，佢叫欲卻還迎猶如夢，即是雞腸包雞肝、雞心及雞腎，以南乳去調味。大口咬下不同的內臟，口感有爽脆有粉嫩，層次好豐富，好惹味，只能大呼膽固醇萬歲。 有Oli在席，總不會缺少一碟咕噜肉，爽彈口感跟開胃汁醬，送飯一流。 吃得盡慶，追加了一碟小炒王來佐酒，魷魚、蒜心、腰果、蝦干及黃椒等等，最緊要夠惹味，小炒王就是要其風味。 朋友說想試試糯米雞，即管試少少。糯米部份做得特別好，是煙韌爽口，與別不同。 單尾的腊味煲仔飯，腊腸與潤腸，油鴨跟腊肉，完全地覆蓋煲面，加上撲鼻而來的香氣，非常誘人。然而，重點其實在於底下的米飯，索盡各方精華，爽身入味，有飯焦，單是吃米飯已經是很高的享受。這裡，的確是吃手工菜式的好地方。餐廳資料:喜聚坊 大角咀利得街10-12號地舖51993895
