作為一個老饕，久唔久就會想吃番餐好的，心中總有一堆餐廳在 Wish List之中，1111 Ones是其中之一。 以羚羊峽谷為靈感的設計，既高貴又唔會令人有太拘謹的感覺，難怪可以得獎。 大汗疊細汗，有理無理先來杯凍飲。以菠蘿為主調，滲出東南亞風情的Cocktail，清新怡人，確係一個很好的開始。 胃口準備就緒，經理便捧來一大盒的食材，係稍後我哋會吃到的菜式之食材，色彩繽紛，砌得靚靚仔仔，咁樣既presentation很是吸引。 是夜的法包與及無花果包，均是店方自家制，尤其喜歡後者，熱暖軟熟，好好吃。我不斷提醒自己要留肚吃往後的七道菜，但真係好難忍口。 接著來是數款悅口小吃，最中餅放入蜆肉做餡，創新又好吃。脆卜卜像薯片的雞皮，唧上咖喱味道的汁醬，也出色。 再來的波波，要一口過吃，因為是外鬆脆內爆汁的東西，滲出的荔枝及點點酒香，層次蠻複雜的，但又好清新，最欣賞佢唔會太甜。 好了，終於開始第一道菜，矜貴的魚籽醬也。用上Oscietre Caviar，墊底係混入了金華火腿的Custard，口感豐富之餘，魚籽醬與金華火腿不單沒有搶去對方的咸香味，反而起了相輔相成的作用，從沒想過可以有呢種配搭。 下一道菜的餃子，餡料用上了花蟹，喜歡佢外皮煙韌的口感，經理席上注入的大蔥汁水，令蟹肉的鮮甜味更加突出，吃得很舒服。 經理拿來黑松露，香氣頓時撲鼻而來。以往嚐黑松露，多半是刨片在意粉之上，呢度又唔一樣，將意粉換成椰菜花，加些少西班牙火腿，及輕怡的汁醬。松露則是刨成絲而不是刨片，成件事夠香得嚟，感覺又唔會好Heavy。 精彩的菜單，應該會有起承轉合。松露之後，接著來是清淡一點的茶漬飯。薄片鮑魚入口軟嫩，用上福岡的綠茶，呢個茶漬飯又係一絕。 跟住的羊肚菌菜式，亦總廚的得意之作。將墨魚膠釀入羊肚菌之內，伴以牛肉及什菇打造而成的湯汁，主角的口感豐富不在話下，湯汁既香氣更令整詭菜式升價十倍。 就是用來清清味蕾的間場雪葩，都會伴上雪耳等食材，不得不佩服總廚做事的一絲不苟。 吃至此時，我倆最期待的菜式終於登場。威靈頓牛聽/吃得多，威靈頓乳鴿大家又試過未? 估唔到酥皮包裹著乳鴿，以及金蠔，味道會是如此出眾！雖然吃了那麼多道菜的我已飽了一大截，但都不但可以吃掉碟上的出品，還毫不客氣地吃了隻鴿腿。呢份威靈頓乳鴿，大推，同埋記緊是要預訂的。 比起威靈頓乳鴿，呢份加大碼的西班牙紅蝦就來得簡單直接。將蝦頭的羔唧在蝦肉上，美味程度即時提升。 結尾的甜品肯定絕不馬虎，係雲尼拿慕思伴血燕，女士們聽到大概會雙眼發光了吧！血燕本身嚐其口感，總廚就注入木瓜杏仁奶來引出味道，很聰明的配搭。 再嘆埋Petit Fours，呢一夜，完美！
