今時今日，大部份Cafe都已唔使排隊，好些甚至拍晒烏蠅 ...南豐紗廠呢個曾經是年青人的聚頭地，當然也不會幸免，要同朋友找個地方靜靜坐低食個Lunch，易如反掌。選來了The Uniek，這裡一邊是Cafe，一邊則是 Lifestyle Store，賣的東西都幾特別和有趣，不過是日我們只是為了吃。 午餐其實並不貴，$78起跳，已包餐湯及基本飲品，同埋無加一收費。然而，中午繁忙時間的這兒，連埋我哋，只三枱客。我們會中伏嗎? 其實我有少少擔心，不過我同朋友講，既來之則安之。是日餐湯，係南瓜湯，小小的一兜，又幾香濃，為我們打了枝強心針。 主食分別點了韓式豬腩肉日式咖喱飯，以及肉丸天使麵。店員好細心，知道我哋分吃，即時奉來小碟。前者又韓式又日式咁，不過唔理佢有幾fusion，最緊要好食。五花腩又唔錯喎，肥瘦有致，口感爽彈，配上帶醒胃的汁醬，再加埋日式咖喱汁去撈飯，比起唔少日式咖喱專門店更出色。旁邊的沙律菜帶有醋酸，正好中和腩肉的肥膩感。 本身麻麻地天使麵，但呢度個麵條略帶煙韌，反而幾合我心。小量三文魚籽、洋蔥及磨菇，撈埋醒胃的汁醬，可以的。西西里肉丸的實感比我預期中有層次，不像是港式Cafe的出品。 午餐包Americano等基本飲品，奶啡要另加十五個大洋，又試試佢既Flat White。正正常常的，無咩需要投訴。
