提起Weekend Brunch，大家可能會第一時間想起自助形式，或者係Eggs Benedict之類，好好少會諗到食中式的。但其實，坊間都有中式週末早午餐的，喜歡食點心既筆者，自然唔會錯過。 今篇所講位於中環的木子園，佢既Weekend Brunch好豐富，四款涼菜、十六款點心、兩款湯羹及甜品，仲有北京填鴨任點任食，另外仲有主菜一款，肯肯定係要食客飽到晚餐都唔使食既格局。 廢話唔多講，單刀直入四味涼菜，涼拌青瓜及木耳爽脆酸香，鴨胸唔會硬轟轟，烤麩軟熟入味，醉雞嫩滑，酒香之餘還滲出微甜。全部涼菜有版有眼，絕對唔馬虎。 兩種湯羹，小朋友一定會中意蟹肉粟米湯，酸辣湯則是偏酸而辣度相對溫和的版本，勝在兩者都是熱度十足，喝湯水絕對不能溫溫吞吞。 點心是每個柯打兩粒。唔少都是傳統的款式，蝦餃燒賣飽滿足料，牛肉球帶有陳皮香，蘿蔔糕煎得香口，也有絲絲蘿蔔。要挑剔的，可說到豉味鳳爪。 由細到大特別喜歡食雞扎，呢度係腐皮包雞件、炸肚、冬菇和厚必火腿條的組合，即是我小時吃的那款，比起今時今日有些地方採用淮山來包扎，芋頭條代火腿，甚或是豬皮取締炸肚，傳統既呢個組合才最岩我心水。 包點都有幾款，例如奶黃流沙包、紫薯包、小饅頭及叉燒焗餐包等，不過我胃納實在太有限，只吃了隻叉燒焗餐包，都幾軟熟，叉燒餡不硬，可以了。至於香口的春卷，即叫即炸都總唔會差得去邊。 愛刺激的朋友，大可來份紅油抄手，雖不是最正宗的四川包法，然而紅油做得香辣，絕對值得一嚐。 片皮鴨係出邊拎，肉嫩而鴨皮像混入了砂糖的入口溶化，香到不得了，熱辣辣食真係無得頂，我唔客氣地拿了三轉。 主菜方面，雖然每人只揀一款，不過是例牌份量，所以多得誇張。咸蛋蝦球，蝦球大隻爽口，不會將貨就價，總之邪惡到一個點。 宮保雞丁都做到甜、辣、酸、香，比起坊間唔少川菜館更優勝。 孜然羊肋排上桌時又係香噴噴，用手拎住支骨大啖齒最過癮。羊肋排好在帶肥連皮又甘香，十分惹味。 甜品的楊枝甘露和蛋白杏仁茶都是任點任吃，個人尤其推薦楊枝甘露，清新醒胃，仲配埋球雪糕，好精彩。 加$188，紅白酒、烈酒、啤酒汽水果汁Free Flow，愛酒的朋友請留意。
