說起來慚愧，做左荃灣人咁多年，經過福來村的海連茶樓無數次，卻從沒試過推門進去。 來到呢類地方，梗係自己搵位喇，你都唔會預有個知客帶位卦? 懷舊屋村茶樓，老闆仍堅持以花碼標註價錢，呢種花碼數字已成為文化遺產，大概只有蓮香樓等極少數既老字號仲用緊，大家其實識唔識睇呢? 荃灣另一老店川龍既端記係要自已開茶，呢度就仲未需要，有姐姐會問你飲咩茶。見佢哋都會沖下啲茶葉先開茶，算係幾好喇。 中午可以叫燒味飯或者碟頭飯，當然仲有點心，阿姐會推架車仔過嚟，款式唔多，據聞每日都係大同小異。 腸粉係舊式一碟三條的賣相，唔係依家一條過長過我條命咁款。皮係偏厚的，稱唔上滑，不過都有唔少叉燒餡，味道係預期之中。 牛肉球一籠只得兩粒，但大大粒的。無話混入勁多芫茜，只有少許馬蹄，勝過口感軟熟唔會實的的，同埋最緊要夠熱，沾了喼汁既腐皮也從來吸引。 糯米包愈來愈少地方有得食，以前在別處食過硬轟轟既糯米，好討厭。呢度既出品好好多，外皮薄而帶點韌性，糯米飯軟熟、乾身，味道都唔錯。排骨唔會有一大陣雪味，我已收貨。 無食燒味飯，要左盅咸魚肉餅飯。肉餅口感實在，唔係鬆泡泡，咸魚係唔香架喇，家陣都唔易搵到細路時食到嗰種咸香味道，以前真係小小一舊咸魚可以送一大碗飯。 對茶素來無研究，但飲杯濃濃既普洱，確實有助解膩既。 平均六十幾蚊一個人，感受下呢種昔日情懷，值得既！有興趣可以睇下片https://youtu.be/ya7wx7jvKeg
