曼谷發展迅速，只是短短兩年沒來，已有兩個大型商場落成，其中之一，是在週末市集翟道翟旁的Mixt Chatuchak。 賣的東西跟週末露天市集差不多，勝在有冷氣，舒服得多，尤其是在外面行到身水身汗，呢度簡直天堂一樣。 商場內設有美食廣場，地方頗大，最重要係價錢超級親民，平均港紙廿蚊樓下便有交易，食到你嘔都唔會覺得肉赤，當然我不是鼓吹大家浪費食物。 我想話，這Food Court除了大，設計也總算花了點心思，譬如說部份座位是鞦韆，是打卡熱點，只是我從來不enjoy坐在韆鞦上用餐，影張相算了。 食物選擇真心豐富，海南雞、豬手、船麵、串燒、沙冰，以至泰式甜品，乜乜乜，應有盡有。試了泰國通胡慧沖介紹的海南雞飯，坦白說油飯稱唔上香，雞肉雖嫩，但總是甩皮甩骨咁，個人真不懂欣賞泰國的海南雞，包括水門的出品，星洲既會更對我口味。然而只賣十幾蚊港紙，仲想點？！ 在另一檔買了海鮮炒河，是濕炒的，材料既有魚塊，還有魷魚及蝦等，幾豐富，可是芡汁太厚太杰，有點怕怕，儘管味道是正常的。 在泰國肯定是要凍飲，蜂蜜涼粉帶點澀，藍莓特飲相對來得更爽皮。 無論如何，花十來廿蚊在這裡涼住冷氣食嘢，已經抵番晒！
