今次繼續一連幾篇講關於香港攞導遊牌嘅考試，有興趣想知筆試點樣溫，可以睇筆試必讀想知道路試係點樣考或者考咩，記得睇路試考甚麼而今次就會講考路試嘅流程～自修生或者未考過嘅你一定要睇落去啦！路試步驟1 – 集合首先大家一早會喺香港旅遊業議會局(北角)先集合，議會一早會預先安排的座位等候，等到大家差唔多嚟齊之後，職員會先讀出路試的所有規則，包括：整個過程要關上所有會響鬧嘅電子裝置、考試時考生不得交談等聽完之後，職員會打開一張座位表， 座位表會列出大家在旅遊巴嘅坐位呢個係十分重要！（但這不等於你已被分配講該路段）即是例如你是坐四號座位，不代表你是考第四路段路試 – 座位分配解說簡單嚟講，第一排的位置是沒有人坐的，因為是預留給考生出來演講之用，之後後兩三排到就是考評員坐位，有兩位考評員，他們會坐近走廊的座位，後一排就是攝影師的座位 (對，考試是會錄影的)攝影師嗰排的另一邊就會有一個準備位置，大家要睇清楚嗰個位置！因為當聽到自己名字時就需要自行上前坐在該位置準備(睇埋下面就會明白)路試步驟2 – 出發去香港大會堂職員講解完規則、大家睇完座位表後，所有人就會一齊落返樓下準備上旅遊巴士，即是考試的車上，上咗車後就要跟返剛才已安排的坐位表入座第一站會去香港大會堂（路線一的起點），由香港旅遊業議會的北角集合點到香港大會堂需要大約定20分鐘，呢段時間就冇特別嘅，大家未開始考試，亦未宣布邊個係考第一路段，大家可以繼續坐喺自己的位置，亦冇人需要坐喺準備位置，喺呢段路程入面， 評分員可能會邀請大家試下個咪或者企位，建議大家唔好怕羞，一定要出去熱下身，試吓用咪和睇吓站姿，路試步驟3 – 到達香港大會堂到咗香港大會堂後，評分員就會問大家會否需要去洗手間，有需要嘅可以去，因為之後就要等到步行路線先可以再去洗手間，等到大家去完洗手間後， 評分員就會宣佈考試正式開始，呢個時候評分員就會讀出第一名考生嘅名，並開始計時十分鐘，咁該位考生就會坐上前到準備位置，當坐咗喺準備位置後就唔可以再睇筆記～所以考第一條路線嘅嗰位考生就有十分鐘等待/準備時間路試步驟4 – 正式開始十分鐘後考試評考員就會宣佈路試正式開始，第一位被抽中已經坐咗喺準備位嘅考生就會出嚟開始介紹路線一，而當第一位考生出緊去第一排（演講位置）時，考評員就會讀出會考第二段路線嘅考生姓名，而第二位考生就要坐喺準備位置準備（不可以看筆記），換言之，第二位考生嘅準備時間就係第一段路試嘅時間，如此類推，當第二位考生準備出去旅遊巴前排位置講解時，就會知道誰是第三位考生，並請他自行坐在準備位置～總結：所以路試之所以咁緊張刺激，全因為考生只會係上一段路線得知自己是否是下一個考生，如果你是考第二十三條路線，你將會一直等，等到考第二十二條時，你才會知道輪到自己了～而你的「準備時間」亦視乎上一段路的長短，今次嘅分享十分長，希望我嘅經驗可以幫到大家，下次會分享下路試的合格秘訣。
