話說... 近期愛上近近地2日1夜HEA酒店既我 有日見到Groupon有呢間酒店既團購 就二話不說Send 去Group chat 度搵腳 今次終於比我撩到 2 pairs 好友一齊去 首先賣個關子先啦 呢間酒店既Selling Point 係係個浴缸同靚景度 大家要留意啊 ^O^ 係灣仔碼頭食好早餐後 就坐過境巴士前往皇崗 之後再坐大約 45min 白牌車去酒店 (都其實都近地鐵站 , 人少可以選擇經濟既交通啊) 深圳 - 隱秀山居酒店 (白金五星級) http://www.castlehotel-genzon.com/ (上圖取自官網) 單係見到個門口就已經覺得開心 再加埋陽光普照 , 真係好有渡假感覺嘎 之後入到房就仲開心 一開門就已經聞到好純既檀香香薰 再加埋呢個哥爾夫球場既靚景就更加一樂也 酒店房既設計係單向, 所以每間房都有呢個景架 好啦~介紹下間房先 我地住既係普通房 , 但都已經有42平方米 傢俬係中西式混合 , 一D都唔老土 , 好新淨 而洗手間就有2個梳妝位 , 之但係個浴缸呢 , 去左邊 ?? 其實個浴缸係黎左露台呢度 (上圖取自官網) 係咪好一流呢?! 仲可以同時容納到兩個大人 , 不過唔好諗住可以裸浸啊 開電視會有住客名既歡迎詞 好啦~係房發完癲就要咋咋臨落泳池曬太陽 泳池旁邊有4個用椰樹搭建既沖身位 而更衣室內亦備有桑拿室及凍水按摩池 另外仲有個室內恆溫泳池架 游完水番房抖抖就落餐廳食Dinner Buffet (上圖取自官網) 食後感 : 2.7分 ( 5分為滿分) 呢個 Buffet 既質數其實都唔算差 只要你唔食生蠔/魚生就一定冇事 但就算食左都冇肚痛既 只係呢2樣都係冇味咁解姐 而其他中式食物味道都可以既 而酒店既周邊其實冇乜建築物 因朋友公幹黎過 , 所以知附近工廠宿舍有士多 今次人多D , 夠膽出去行下勒 酒店門口直行大約10分鐘就見到一堆宿舍 買D宵夜就番去準備下半場 泰式按摩 Spa Center Lobby 周圍都點左香薰 , 係咪有少少幾可亂真以為係泰國呢 ? Spa房內既水力按摩池 疏肝完就問下服務員有冇得買房果隻香薰 點知原來房用果隻係勁貴 , 叫我地唔好買 服務員仲比埋佢地攞貨既價錢表我地睇 50ML都要HK$800 咁貴既原因係因為正宗原木提煉喎 *o* 第二朝食過早餐後 , 我地就去打下Golf 酒店有Golf 車接送 , 5分鐘左右就到達......練習場 ^u^ 打完扮識打既Golf 就要番房用下果個 ---- 無敵大浴缸 HA~泡泡浴係自己私伙既 (不過酒店都有得賣) 嘆埋呢個 BUBBLE BATH 之後就要番香港LU 住後感 : 4.5分 (5分為滿分) 整體感覺好好 , 硬件好新好企理 唯一唔好既就係食物方面 如果可以做得好味D 就Perfect 環境靚 , 起身見到呢個綠悠悠既景 心情, 眼睛都好舒服 如果偶爾想離港抖抖 , 呢度值得選擇 每人平均消費約 HK$1000 後記 除左SPA之外 , 所有野都係Package全包既 另外 , 如果想住得大D可以+HK$400 轉去復式房 不過大致上既分別就只係多左個廳同樓梯 去朋友房參觀過 , 如果2個人 , 其實唔需要加呢$400蚊 (上圖取自官網) 另外...睇下呢2條友幾咁開心 所以平時再忙...耐不耐都應該要比自己放鬆下 希望大家可以再夾到時間去玩啦 > 完 <
