今日我地繼續聖陶沙之旅， 而重點當然就係Universal Studio， 新加坡環球影城la~ 我地同琴日一樣搭MRT再駁單軌入去， 其實我地一落車就已經人頭湧湧咁滯， 好多人下lol~ 好彩我地一早買咗2-day pass， 所以唔洗排長龍咁買飛， 只係去customer service o個個counter換飛就可以la~ 我地好例牌咁o係環球影城嘅地標——旋轉地球儀o個度影張大合照， ~ ~嚟到第四日，聖陶沙Day 2~ 之後就正式入場la~ 我覺得新加坡環球影城其實同香港迪士尼有d似， 似嘅原因係大家一樣咁細。 而一入場就係類似美國小鎮大街咁嘅Hollywood， 一條行人路o係中間， 而兩邊就係d紀念商店。 Hollywood 我地就好快就skip呢度， 因為呢度臨走都一定會經過， 所以可以臨走先慢慢睇。 於是， 我地就加速向New York園區進發， o係New York園區， New York 我地一抬頭就見到芝麻街嘅招牌 ， 我地亳無猶疑咁衝咗入去睇下玩d咩ga先！ 原來呢個機動遊戲叫芝麻街之意大利面太空戰， 淨睇個名都知係小兒科野， 不過唔洗排隊又有冷氣， 未妨唔係一個幾好嘅熱身遊戲嚟ar~ 之後， 我地就去芝麻街對面嘅Steven Spielberg嘅電影特效片場， 由於成個影城嘅地方唔大， 所以個片場都只係一座好細嘅攝影棚嚟， 之但係真係唔好睇小個片場， 片場地方雖小， 但畀觀眾所感受嘅威力係好大ga！ 因為入面係模仿美國颶風吹襲嘅場景， 所以大家唔單止感受到大風， 仲見識到火花、浪水同差d撞埋身嘅大型物件， 完全係感官上嘅震撼ar！ 震撼完， 我地就o係New York個公共圖書館門口同Cookie Monster影完大合照就向另一園區出發la~ 同Cookie Monster大合照 o係New York隔離就係科幻城市， Sci-Fi City， o係Sci-Fi City有咖啡杯、Transformers同埋雙軌過山車嘅機動遊戲， 我非常期待去玩o個個過山車， 點不知佢竟然無開wo~ 真係好失望ar！ Sci-Fi City嘅雙軌過山車（上圖）及Transformer（下圖） 唯有淨係玩Transformer la~ ar B話：呢個Transformer同之前o係大阪玩Spiderman o個個差唔多 都一樣係咁刺激ge~ o個條人龍雖然未之於排到出門口， 但原來o係個室內入面入面打咗N咁多個蛇餅， 排咗成個鐘咁滯！ 好彩我地成班friend一路排隊， 一路講笑、傾計， 唔覺唔覺咁就排到我地lu~ 其實呢個機動遊戲真係不得不佩服d製作人員， 佢地竟然諗到3D畫面配合現實嘅場景， 再加上煙火特效， 就好似係過山車加動感影院嘅結合咁， 真係好令我意想不到！ 離開Sci-Fi City， 我地就去Ancient Egypt。 Ancient Egypt 講到埃及， 當然少不了木乃衣la~ 所以， 我地又第一時間走入去玩——木乃衣復仇記， 呢個係一個室內過山車嚟， 賣點係「急轉彎、快翻轉」， 所以會要求大家將d隨身行李鎖o係locker度， 我地當然乖乖咁將d背囊鎖起晒la~ 而正當我鎖好晒行到入去排隊， 我先醒起自己仲戴住副太陽眼鏡！ 真係激死la~ 除咗佢又唔得， 因為副眼鏡有度數， 一除咗就等於無戴眼鏡咁， 咩都睇唔到； 但戴住佢， 入面又黑忟忟， 睇唔得清。 結果我只好選擇後者， 由於戴住副太陽眼鏡o係黑忟忟嘅環境入面玩， 只好用心去感受。 Um... 玩完嘅感受其實覺得個過山車真係幾刺激， 有急彎之餘， 仲會有向後衝， 真係好想再玩多次！ 奈何又係太多人排隊la~ 我地只好去玩第二個遊戲la~ 我地o係Ancient Egypt見到有另一個叫Treasure Hunters嘅遊戲， 點知當我地想入去玩嘅時候， 企o係門口嘅職員竟然同我地講：呢個遊戲都要排好耐， 而且係主要for小朋友玩！ 叫我地諗清楚先好入去， 咁見佢咁講， 我地就唯有去下個園區迷失世界（The Lost World）la~ 呢個園區即係侏羅紀公園， 以恐龍為主題。 The Lost World 於是， 我地又衝去玩另一個機動遊戲——侏羅紀河流探險 ， 呢個遊戲係我覺得全場最值得去玩嘅一個機動遊戲！ 因為當玩完之後， 大家都會異口同聲咁講句：估唔到lol~ 一般嘅激流都係先上斜後sir落去， 然後濺起大量水花， 令人濕晒ga ma。 之不過， 呢個激流係無上過斜， 隻艇都會o係高處衝落去， 皆因隻艇係識得去搭lift lol~ 又一個unexpected point！ 呢個侏羅紀河流探險個氣氛亦造得好好， 不時有「danger、danger」呢d alarm聲， 真係好令人難忘， 所以呢個激流好值得去玩！ 玩完激流， 我地見仲未夠鐘睇o個個大型表演， Water World， 但o係附近嘅另一機動遊戲， 天幕飛行 又好多人排隊， 玩得嚟又睇唔切個show， 結果， 我地就行咗去隔離個園區－－遙遠王國， Far Far Away。 遙遠王國 先去睇個唔多人排隊， 而又可以容納好多人o係同一時間玩嘅史力加4D Adventure ， 即係睇動感電影， 3D畫面加上會震震下嘅座椅， 講唔上刺激， 但就可以令玩到攰攰地嘅我地輕鬆一下！ 我地仲玩埋個小朋友過山車， Enchanted Airways， 跟住先返番去睇Water World。 Water World又係有賣點ge， 話說佢個座位區域劃分咗全濕區、半濕區同非濕區， 亦即係分別前排、中排同後排座位。 由於， 我地都好遲入場， 得返d全濕區正中間第一直排嘅位置， 如果唔係， 就要企o係非濕區嘅山頂位後面睇。 於是， 我地又膽粗粗， 心諗：之前玩激流都濕咗， 唔怕濕到落底la~ 所以， 我地就坐o係全場正中間嘅第一排la~ 可能因為預咗濕， 所以比預期濕少咗。 但的確有全濕區嘅觀眾被邀請出去做嘉賓， 然後畀人用水淋， 淋到由頭濕到落腳！ 講番個表演， 其實內容都係講個女主角畀個壞人捉咗， 然後男主角憤不顧身咁救個女主角， 當中有好多煙、火、槍嘅特效， 因此內容老土， 但都睇到人拍爛手掌ga！ ~我地都真係濕晒ga~ 我地之後就去埋馬達加斯加， 馬達加斯加 o係o個度玩埋個木箱漂流記， 又即係坐住隻木箱造型嘅船仔o係度兜圈睇公仔， o係馬達加斯加hea完， 我地就一支箭咁衝返去Hollywood， 去劇院睇埋最後一個表演， 呢個表演就係d歌舞表演嚟， 用好classic嘅monster做主題， 但就唱pop music。 一場精彩嘅表演過後， 我地就沿住大街兩旁嘅商店， 一路window shopping， 一路講下、笑下咁離開環球影城lu！ 其實， 我地o係環球影城無食過野lol~ 只係食過下d snack咋， 所以好肚餓lol~ 要即刻去搵食！ 初時我地plan係去牛車水食afternoon tea， 然後行埋牛車水， 再o係o個度食晚飯。 但我地o係環球影城玩到快樂不知時日過， delay咗原定嘅行程， 牛車水行唔到la， 只好o係牛車水嘅Smith Street食餐勁嚟完結今日嘅行程la~
