又去韓國la~ 不過， 今次係去釜山同濟洲。 唔係首爾la~ 而今次同過往o個兩次都係搭凌晨機， 唔同之處， 就係今次搭嘅係釜山航空。 的確係第一次搭， 心情都有d緊張， 唔知架機點la， 唔知d空中服務員點la， 好多unknown咁。 之不過搭落就覺得間航空公司都算係咁， 因為正正就係搭呢d細細架嘅機種， 無個人電視提供， 無飛機餐供應， 所以個人可以好專注咁訓覺！ 到步後， 第一件事就係去唱錢， 由於時間仲係好早ja， 因此， 我同媽咪兩個先去食個早餐。 我地一人叫咗一個餐， 一份三文治， 一份熱狗， 估唔到份三文治都幾大份下， 所以食到我地都幾飽。 早餐過後， 我地就o係出發去第一個釜山景點－－Skywalk。 其實我覺得呢個Skywalk擺明抄美國大埉谷， 而不同之處就係釜山呢個蚊型得多la~ 咁所以大家都唔會唔敢行落d玻璃上面遠眺五六島嘅景色la。 上圖就係五六島嘅外觀 o係Skywalk欣賞完五六島嘅景色後， 我地就去龍宮寺睇櫻花la， 其實o係馬路兩旁已經遍滿咗櫻花嘅色彩， 但去龍宮寺係十分值得ga！ 龍宮寺除咗係歷史建築外， 更因為依山而建， 且貼近海邊， 本身個環境已經好優美， 再加埋開得燦爛奪目嘅櫻花， 就真係靚到嘩嘩聲la~ o係櫻花海下陶醉過後， 我地就去埋樂天百貨行街加食埋lunch， 由於頭先早餐都食得幾飽下， 我地就去咗樂天隔離d街邊檔掃街， 當然就係去食炒千年糕la~ o係街邊食炒年糕真係別有一番滋味ga！ 食完野， 我地就返番釜山金海機場搭內陸機前往濟洲lu！ 搭內陸機畀我嘅感覺係似搭火車咁， d飛機班次唔洗30分鐘就一班， 而且乘客都係拎住張收據兼登機証嘅飛仔就可以上機ga la。 由於係內陸機關係， 完全無移民局、海關嘅手續需要處理。 咁大約一個鐘嘅機程， 我地就到咗濟洲la~ 濟洲係一個風景好靚、好休閒嘅地方， 就連韓國人自己放假都會帶埋一家大細嚟渡假， 可見濟洲係一個旅遊勝地。 我地一到步就去濟洲一個好出名嘅景點－－龍頭巖！ 龍頭巖其實係天然而成嘅景觀， 可惜， 我地去到係接近日落之時， 西斜到不得了， 影相時完全背晒光， 好難先影到張靚相， 唯有將呢個龍頭巖嘅美景藏o係自己腦海度la~ 入夜前我地去食埋晚飯， 就完成第一日嘅行程lu~
