話咁快就第四日la~ 今日嘅行程係先去新北投， 然後去淡水， 最後去士林夜市。 所以， 我地一食完早餐就搭捷運去新北投la~ 其實， 新北投係可以去足一個朝早ga lol~ 根據當地建議嘅遊覽路線， 要行晒真係要預一大個朝早， 所以， 我地都只係揀d景點去就算la~ 第一個目的地就係地熱谷， 行到入去， 的確有陣臭蛋硫磺味， 不過， 可以近距離咁接觸溫泉嘅源頭， 臭都變得不在乎la~ 地熱谷 o係地熱谷影完相， 我地去咗梅庭參觀， 梅庭係一座日式加西式嘅建築物。 事關當時好多日本人聚居新北投一帶， 而佢地又因思鄉關係， 所以想起一d日式建築嚟自住， 不過， 由於台灣氣候問題， 加上當時崇洋心理， 因此就將日式同西式嘅建築方法嚟起呢座梅庭la~ 梅庭模型全景 隨後， o係梅庭有個義工大使建議我地去睇埋座天主教堂， 話座教堂有好耐歷史， 值得一睇， 於是， 我地就起行去睇呢座天主教堂。 可惜， 教堂係謝絕入內參觀ge， 大家只可以o係外面影影相ga姐！ 老實講， 我覺得座教堂無乜特別， 如果下次再去新北投， 呢座教堂如非路經， 都可以ignore咗佢lol~ 跟住我地就諗住去浸溫泉la， 點知間溫泉會館o係呢段時間休息， 所以， 我地唯有先去溫泉博物館hea半個鐘la~ 的確， 大家o係博物館都係hea ga姐， 無乜認真參觀。 不過， 淨係咁hea睇， 大概都知係介紹當時日本統治時， 新北投呢帶d居民生活係點。 o係博物館hea咗半個鐘後， 我地就去浸溫泉lu~ 可能我地揀咗間好平嘅會館， 所以要自備毛巾、泳裝等， 而且入面都幾多人下， 仲要係d伯伯同婆婆lol~ 搞到我地一入到去， 成班上咗年紀嘅伯伯、婆婆係咁望實， 初時真係有d尷尬lol~ 但耐咗之後， 佢地會主動同我地傾計， 講下佢地台灣有幾好咁； 另外， 都有好多外國人嚟浸， 所以， 大家都可以同d外國人交流、交流一下！ 呢間溫泉會館成個場其實唔算大， 都係分咗4個泉區姐， 分別係低溫（36℃左右）、高溫（40℃左右）、起高溫（≧45℃）同埋冷泉（即凍水區）。 我地4個都試晒， 各有各鐘意嘅泉區， 但係， 溫泉唔可以浸大耐， 大概15分鐘就好上一上水la~ 大家浸完溫泉， 梳洗過後， 就o係新北投車站附近食個下午茶。 雖話說係下午茶， 但份量係午餐咁ga lol~ 我嘅下午茶：豬骨湯拉麵 果然嚟台灣食野係最好ge~ 食完野， 我地就去淡水睇日落la~ 我自己唔係太識欣賞日落嘅美景， 於是， o係大家去淡水碼頭旁邊set相機時， 我就去睇下有無d咩手信買。 之前聽大表姐講淡水魚酥好好味， 咁我就睇下有無la~ 魚酥搵就搵到la， 但就唔係之前大表姐買返嚟o個款， 而且試食過後， 覺得味道一般， 所以無買到~ 我行到差唔多日落嘅時候， 就會合返其他同學去睇日落， 影日落la~ 太陽日落西山後， 我地就去士林lu~ 同師大一樣， 展開掃街行動。 但係士林夜市比師大唔同， d鋪頭會擺好多貨o係門口， 所以， 我地嘅眼球都畀d貨吸引住， 唔係食咗好多野就shopping la~ 大家買咗好多T-shirt、褲、鞋... ... 由於咁嘅關係， 我地o係士林都係食咗 藥饍羊肉、藥饍肋排、藥饍排骨、胡椒餅同埋旋風薯塔（由上至下、左至右）姐~ 飽就當然未la~ 結果， 大家返到酒店， o係樓下間seven買d便當返上房食， 一路食一路pillow talk la~
