訓醒一覺， o係酒店食完個早餐， 我地就起程去中正紀念堂la~ 一班熱愛影相嘅同學就o係度影相ar， 影相ar。 其實， 呢個紀念堂o係10年前同10年後嘅今日都無乜太大分別， 唯一嘅分別就係o係紀念堂正門前個牌坊， 由大中至正改為自由廣場四個大字。 我自己覺得自由廣場四個字的確可以表達民主所帶來自由， 但就欠缺咗以前大中至正嘅一份威武感lol~ 大家影完相， 我地就去返台北車站搭火車去菁桐、十分， 展開今日嘅鐵道之行。 我地搭火車o個陣， 其實個天都開始暗la~ 而出發前o係酒店上網， 更得知香港今日掛黑雨， 紅隊仲水浸埋添！ 心諗：希望台灣唔好落大雨la！ 我地o係火車度買咗個便當， 我一打開， 不禁又要講一句：「好大份ar！」， 的確， 一盒望落去扁扁地， 但一打開卻鋪滿晒成個盒！ 有豬扒、滷腐皮、滷水蛋、咸菜配白飯 味道一般， 但真係超飽~ 我地由台北車站搭到去瑞芳， 再o係瑞芳買咗張一日遊車票， 轉搭小火車。 我地去到菁桐站就落車lu~ 一落車就見到鐵道故事館， 入面有好多野賣， 有名信片、精品等。 人頭湧湧嘅小店 不過， 最多人o係o個度唔係買野， 而係同館外嘅懷舊郵筒影相。 之後， 我地就再向前行， 行入路軌， 感受一下行路軌嘅感覺。 仲記得第一次行路軌係o係韓國嘅正東津車站， 但今次同o個次有d唔同， 正東津始終有d現代城市味道， 但今次o係菁桐， 感覺就好似返咗鄉下， 因為呢度鄉味濃d~ 影完相個天開始落大雨la~ 於是， 我地就o係附近d鋪頭仔行行逛逛la~ o係菁桐逗留咗咗1個鐘左右， 我地就趕返上小火車去十分lu~ 去到十分， 雨都仲係咁大， 我地只好o係d鋪路入面一邊睇下d精品， 幫襯下， 一邊被雨la~ 好彩， 我地o係行到放天燈嘅位置時， 雨開始細la， 而亦有唔少人開始放天燈la~ 於是， 我地就集齊人馬去放天燈lu~ 不過， 由於有兩位同學去咗買野， 見唔到佢地， 再加上時間緊湊， 要就時間搭火車去下一站， 所以， 我地只有5個人去放。 我地o係天燈上寫上大家嘅願望， 並寫晒我地7個人個名， 雖然o個兩位同學人不在， 但佢地個心係同緊我地一齊ge， 即係我地7個人個願望都能夠呈現o係天燈上！ 祈求願望成真吧~ 我地放完天燈， 時間就啱啱好， o個兩位同學又已經o係車站， 我地好順利咁趕到班火車ar~ 其實， 我地仲諗住去埋候硐， 但因為之前個場大雨， 大家都覺得d貓貓應該走晒去避雨， 所以， 我地就直接去返瑞芳搭火車返台北車站算lu~ 由於我地都幾一袋二袋下， 咁我地就決定先返酒店放低d手信， 然後先再出發去師大夜市。 我地搭捷運o係台電大樓落就到師大夜市la~ 可能今朝大家都行得好攰， 所以o係師大， 大家都以搵食為目標， 無咩點睇衫、褲之類 我地o係師大食咗烤雞扒、串燒羊肉、炸魷魚、臭豆腐、捲蛋餅同蚵仔煎。 我覺得最好食嘅就係個炸魷魚， 師傅將成隻新鮮魷魚放落個炸爐度， 待熟後就切件， 再撒上自選嘅調味， 真係好好味ar~ 其次就係個捲蛋餅， 佢有好多味可以揀， 我地揀咗四款味道， 當中最好味嘅就係高麗菜， 因為d菜嘅味道好甜， 而且份量又好夠， 配合埋個蛋真係唔錯。 我地o係師大掃完街， 行咗一陣就結束今日個行程， 返酒店lu~
