訓醒一覺， o係酒店食埋brunch， 我地就搭酒店提供嘅篤篤去芭堤雅碼頭， 出海去珊瑚島lu~ 我地揀咗搭150bhat來回嘅客船去珊瑚島， 船程都要成個鐘， 不過好在架船有得遮蔭， 如果唔係， 實曬到不得了！ 我地落船， 去到Samae Beach後， 就開始搵我地想玩嘅野。 唔熟水性嘅我真係有d膽怯ga， 但自己之前見過其他人玩， 好似好輕鬆咁， 加上同學嘅鼓勵， 結果我地去咗玩水底漫步~ 由於玩呢d活動都唔係o係呢個灘， 所以， 我地要跟o個個agent搭電單車， 去另一個beach， 再上快艇先去到玩嘅水域。 我地初時以為要換潛水衫之類， 點知原來着對膠鞋， 笠個太空帽， 就落得水ga la喎！ 不過o係落水前， 佢都有個briefing ge， 教你點樣呼吸、睇野， 仲有一d手勢。 呢個水底漫步， 我地每人要畀600bhat， 其實都算抵ge， 因為行成半個鐘， 仲真係可以親手摸下d珊瑚， 餵下魚仔， 仲有得食下d不知名嘅「魚生」， 最後每人仲有一個貝殼手信攞返上水！ 玩完水中漫步， 由於有個男同學想玩埋個Parasailing， 所以我地又再登上另一隻船仔去第二度。 我地一去到， d工作人員又係咁叫我地玩埋一份， 係咁講唔危險、唔危險！ 結果， 有個女同學第一個受慫恿， 去咗玩， 仲要佢玩完先到個男同學玩， 真搞笑。 我見佢地d設備都算ok， 而已d人真係好熟手， 再加上原來係唔洗落水ge， 所以我就接受慫恿去玩la~ 佢一幫我着好晒d架撐， 而個男同學又一落嚟， 個工作人員就捉住我叫我快d跑， 而佢地就好快手咁幫我扣上個傘度， 唔洗十秒， 我就吊咗上天la！ o個一刻， 我無玩水底漫步咁驚， 可能我都好鍾意飛上天嘅感覺， 所以， 一d驚嘅感覺都無， 只係略厭個飛行時間短咗d。 因為只係飛咗一個小圈， 無乜特別嘅風景睇就落返嚟， 所以700bhat就有d似一陣間就蒸發咗lu~ 而呢個Parasailing雖然覺得無咁好玩， 但由初時只有一個男同學玩， 都變成五個人玩， 係ge， 有d野係應該襯年輕就瘋狂一下ge~ 玩晒呢d， 我地就返番去Samae Beach等船走lu~ 不過今次隻船無位揀， 因為我地都幾遲上船， 要坐d幾曬下嘅位。 所以如果下次再去， 最好早少少行返去碼頭， 咁就會好d。 而我地返到去市中心， 就當然返番酒店梳洗一下先la~ 然後， 就o係The Avenue Pattaya搵咗間餐廳食飯， 味道一般， 但食完之後大家都好開心， 因為我地竟然o係度撞到另一班同學！ 真係世界真細小！ 最後， 我地就以腳底按摩嚟完結今日個行程lu~
