前日獲朋友邀請為佢遠道從來既歐巴做一日導遊遊香港 第一次帶外國人周圍去當然要盡地主之誼帶佢吃喝玩樂啦 其實全日安排既活動都比較簡單以地道為主 什麼景點山頂；大佛；主題樂園都唔係行程之內 畢竟只得一日時間 只得飲茶；搭渡輪；荔園；行商場；去茶餐廳；睇戲；食煲仔飯；行廟街；行海滂... 歐巴對香港感覺非常新奇 而我對佢既反應都覺得十分有趣 如果有韓國"千孤"遠道而來 不坊參考一下有咩細節可以留意下 1.天氣 由於我地係機場去到尖沙咀都係搭mtr 一上地面歐巴第一句就係「Hot」 見佢大汗疊細汗同我地左捐右捐 真係唔好意思 - 無辦法人地韓國夏天都係涼既 而香港就只有焗到癲既熱風 失禮失禮 2.親切 當我地熱辣辣濕淋淋以為佢一定超後悔黎香港既時候 突然聽到歐巴大笑 一望個去見到佢指住某韓國餐廳既招牌講左句韓文 原來佢笑緊間鋪名好攪笑 之後一路上都間唔中聽到佢好開心地嗡一兩句韓文 - 細心諗下原來當自己去到外地 一個完全陌生既國度 發現自己熟悉既文字係會有另一番親切感 3.時差 11 am行入The one歐巴用有限既英文問左一個問題 "why shop not open?" 或者對歐巴黎講11 am已經唔係早 - 講開又講自己都從來冇試過11 am行入The one 4.飲茶 "香片；普洱" 係一個完全唔知韓國人會接受咩茶既情況下 麻煩綠茶紅茶全上 可惜最後歐巴飲過一啖香片後寧願選擇飲水 可能茶味太濃不太接受到 食物方面都係果一盅兩件燒賣蝦餃唔少得 而佢最鍾意係香口炸兩 無辣不歡既歐巴要求辣椒油 係我責怪緊自己點解可以咁唔細心準備辣椒油之際 "oh spicy!!!" 歐巴將佢手上沾左辣椒油既燒賣放入口之後 "Korean spicy and HK spicy not same" - 我發現原來韓國人怕香港辣... 5.交通 我地選擇搭渡輪去荔園 歐巴由買票到落船都十分興奮；新奇 佢表示韓國好少會坐船 除左去比較遠既小島 就好似我地既長洲／南丫島 歐巴對雙層巴士感興趣 所以我地一行人陪佢由佐敦等20mins巴士去10mins車程都冇既尖沙咀 誰不知....最後黎左架單層巴士 對於人山人海番工時間既MTR歐巴表示比韓國subway乾淨；寬敞 面對住一班好似動物大遷徙既場境有點兒嚇親歐巴 6.荔園 當然韓國都有theme park 但經我地解釋呢個樂園消失左20年今年先再出現番 歐巴好似覺得樂園同自己特別有緣 但我對佢贏唔到"打紙牌"耿耿於懷 - 仲以為佢生長於泡菜國會好拿手... 我期望太高了~ 7.娛樂 由於天氣太熱冇辦法再留係室外 只好衝入IFC睇下有乜戲睇 細心既我當然有事先問英文有限公司既歐巴 會唔會睇唔明啦~ 當時拍晒心口既佢睇完成套戲 一臉倦容地同我講佢聽唔明... - 睇戲呢種玩意絕對不適合英文有限既韓國人 8.茶餐廳 黎得香港當然唔少得去茶記食西多士；飲奶茶啦 入到果間位於尖沙咀既茶餐廳(全名唔開喇) 嗌左一杯奶茶同西多士 因職員既不和善對待令我為之憤怒 歐巴一句"i feel your angry, like HK movie" - 就知道香港除左古惑仔外 嗌交/冇禮貌都係出名既... 9.廟街 "seafood?" "no! only shrimp" 蝦醬通菜；生炒骨；蠔餅；蒜蓉開邊蝦；咸魚肉餅飯 原本以為佢接受到濃味既我自以為視認為係完美餐單 錯! 大錯特錯! 歐巴完全接受唔到蝦醬 所以咸魚我都唔旨意佢岩胃口 但好彩其他既佢都鍾意 特別係蒜蓉蝦；蠔餅 - 明明韓國食物都屬於濃味 加上歐巴對蝦唔反感 我對佢接受唔到蝦醬依然百思不得其解 10.星光大道 尖沙咀海滂遊客必到但唔代表星光大道都係 因為對一個只認識Jacky Chan 什麼白雪仙；任劍輝毫不認識既外國人 望住1個2個唔認識既手掌 的確有D無聊... 幸好有維多行亞搭夠 歐巴對香港夜景十分讚嘆 秒殺左不少電話儲存容量 11.夜生活 原本打算直落糖水／飲酒 可惜歐巴對夜生活不感興趣 所以活動變為道別／番歸...
