係阿盧生日之旅第3日安排左個行山活動 就係由梅窩行到去愉景灣 一早上網做research得知呢條徑唔難行 經過之前既馬鞍山郊遊徑後對行山充滿自信 更多有關 〈處女山行 馬鞍山郊遊徑〉 起點由銀礦灣酒店出發 面對海向左沿沙灘直行途經有好幾間士多 而未食早餐既我地完全冇停低食野既意念就一直向山行 諗住快D去到愉景灣再食 一路行經過公廁;小橋就會見到指示牌 亦即係代表山徑係附近 山徑口有間賣飲品既店舖(其實係人地屋企) 呢個係你最後機會 溫馨提示:盡管網上講到條路幾易行 但係烈日當空下建議每人一枝大水 千萬唔好怕重 到時候中暑仲麻煩 而我就因為太輕視成件事 好在係酒店拎咗枝大水 否則一定新聞見 點擊圖片放大 係我面前係一條大斜路而係我背後係沉重既背包 再見喇梅窩!我地向住愉景灣方向一直上 沿路有唔少行山既人落黎 大斜路行完到長樓梯 儘管對自己幾有信心 但眼前既長樓梯同身後既沉重背包令我既信心好似我啲汗咁流失曬 加上空蕩蕩既胃 令呢次山行難上加難 點擊圖片放大 +2 一路行行行汗一直流 除咗喘氣聲同蟬聲 都聽唔到其他聲音 行幾步坐低抖下欣賞一下風景(望到咁靚既風景真係乜都值得) 雖然眼前仲有好多奪命樓梯 唔知係咪身體已經適應咗冇咁辛苦 但依然需要放慢腳步 天氣真係好到不行 點擊圖片放大 跨過高高低低既樓梯 幾次誤以為就黎行完 終於⋯見到涼亭上到山頂喇 用咗幾多時間我真係唔知道 但上到黎就等於為我打咗枝強心針 好好欣賞一下好天氣既景色 點擊圖片放大 抖下飲下水抹下汗影下相係時候落山喇 正所謂「上山容易落山難」絕對冇講錯 雖則精神已經好番好多 但又有另一難題「對鞋摑腳」 點擊圖片放大 好快就行到去呢條山徑景點之一 十字牌牛奶廠舊址 日光日白就咁由出面望入去都覺得有點恐怖(陰風吹過) 其實只係一個棄置咗既建築物 難以想像以前係呢個山卡啦地方整完牛奶係點樣送落去 點擊圖片放大 再行前少少就會見到神樂院 一個咁神聖既地方所以都唔入去打擾參觀 只係出面窺探下影下相 可見呢個神樂院十分簡單 大概都係供信徒上黎團拜下 點擊圖片放大 +2 之後一直行會開始見到民居 千萬唔好開心得咁早未行完咖 行到去其中一間民居發現有飲品賣(哈利路亜) 一枝保礦力比我地秒速KO 呢到既屋隔離都會有一塊田地 好田園 溫馨提示:小心唔好行咗入人地屋企 呢到既屋企好多都中門大開 大概15-20分鐘就會見到愉景灣 行前少少就到達愉景灣巴士廠 如果要去愉景灣商場就要行多幾步喔 今次既山行對我地黎講十分之地獄 雖則我鐘意同陽光玩遊戲 但係冇食早餐,烈日當空,超重包伏既情況下就算本身幾易行都十分辛苦