最近得知長隆有個海洋王國 海洋公園我真係去到怕 趁有機會請一日假離開下香港 不失為一件好事 今次捌低男朋友 決定黎個兩女勇闖珠海長隆 首先點解係勇闖？ 因為我地連幾個唔同地方既長隆都唔知... 一度以為水上樂園，動物園，機動遊戲同海洋王國係位於同一個長隆 請恕我愚昧 海洋王國其實位於珠海 係唔同咖 套票係經旅行社買 一個月前吼準特價即刻落手 船票來回澳門+車票來回珠海+1晚園內酒店+1次性樂園門票 每人盛惠$8xx 沒錯！去程回程會經過馬交 所以回程我選擇夜啲船 可以順便係樹遊蕩下 $8xx 2日1夜 珠海澳門自由行 連主題公園門券，酒店 抵呀！ 就抱住「去個近近地又短短地又平平地既旅行」心態開始呢次行程 早上9:30係港澳碼頭會合 早過番工冇陰公 由大埔撘307大約1個鐘到達 慘在我上車先發現八達通冇錢要落車增值 咁就miss咗班車 好彩10:30船 去到仲有時間食少少嘢 點擊圖片放大 經過1個鐘多既船程 到達馬交氹仔碼頭 甫出碼頭向左行就會見到去珠海長隆穿梭巴士站 大約等15 mins 車來了 車程只需10分鐘就到出境站 落車出境再上車 再過10分鐘落車入境 原車去大約30分鐘到達 (第二次上車發現多咗人 機警既司機立即趕走想撘霸王車既2個大陸人) 第一個站先到橫琴灣酒店 如果入住馬戲酒店既需要係到轉另一架shuttle bus 而我地既企鵝酒店同海洋王國一樣係第2個站 點擊圖片放大 落車後向左行就係海洋王國 我地決定先去check in上房放行李 其實一路指示都好清晰 就算睇唔明都總有一個能操廣東話既職員係左近 房間以企鵝為主題 還算光猛乾淨 值得一讚既係廁所入面既用品好齊全 冇乜特別甩漏 酒店有便利店 但係屬於掠水價格 建議自備零食／飲品 話說我地check-in後感到肚餓 但如果坐低食野比人掠水又可能唔夠時間玩 所以買左值RMB$10既細包裝oreo 感覺包oreo特別好食 由於我地係網上買票 需要用呢部好似ATM機換E-ticket 用法好簡單 入番個換票編號加手提電話就可以順利換票 方便又快捷 唔想比樂園掠水 所以每人帶左枝飲品 原來入場前需要安檢 好彩冇被沒收(狂怕心口定驚) 入場後見到呢隻超大魔鬼魚 興奮心情突然turn on!! 園區分為4個 我地先朝住北極區進發(朋友特愛企鵝) 北極區有2個館 北極熊；企鵝 除左參觀外 仲有不同機動遊戲 但縱使熱愛機動遊戲既我 大陸既真係唔夠膽玩...... 點擊圖片放大 +2 呢到既企鵝比香港海洋公園既多好多 活動地方大好多 感覺周圍漂浮住好多企鵝 有巨大玻璃隧道 感覺距離好近 就算不太好企鵝既我都覺得好開心 更何況熱愛企鵝既朋友 點擊圖片放大 +3 北極熊館外有灰熊 可以買飼料掟比佢地(又一種搵錢機會) 眼見每次有人準備拋出飼料 D熊就會"請請" 心不禁酸一酸 感覺佢地平時冇食飽 所以先會做出乞求既動作 真係"訓練"有素... 館內有個水底玻璃 可以睇到北極熊係水入面既一面 第一次見到加上咁近距離北極熊既我 感到興奮 除左北極熊仲有雪狼同雪狐狸 一班超型雪狼困係一個好細既範圍 隔住個玻璃到feel到佢地既唔耐煩 而雪狐狸好可愛 不過好多隻打交打到甩晒毛 可想而知 佢地有幾百厭 點擊圖片放大 同白鯨一齊既有海龜 不過個個入去都忽略左困係細魚缸既2隻海龜 一枝箭衝去睇白鯨 可能始終白鯨原本生活係比較深水 所以館內都比較暗 加上佢地游得超快 好難捕捉到佢地既美態(10張有9張都影唔到) 白鯨樣好可愛 額頭腫起 面帶笑容 從職員講解得知額頭果舊係GPS 令佢地接收同類信號 點擊圖片放大 +5 鯨鯊館有比較多唔同種類魚 鯊魚；魔鬼魚；熱帶魚；水母 有一個同海洋公園差唔多既超大魚缸 而我係到得知原來地球人對月球了解既比海洋既更多 令我覺得海洋更好可怕 單單上面鯊魚個樣已經夠嚇窒我 更何況生活係從來未有人發掘過既深海生物 諗起都心寒 想睇既都睇晒 又熱又焗又開始攰既情況下 我地抱住一個唔執輸既心態決定睇埋海豚 去到海豚島 只見幾個海豚鰭 最後決定放棄 因為超級肚餓既我地個心已經飛到自助晚餐 點擊圖片放大 由於我地好多地方都冇去加上冇玩機動遊戲 幾個鐘已經夠我地玩 但有D劇場既 如果遇岩時間不妨睇下 種類都幾多 而我地就遇岩係樂園中間有水上花式表演 都幾精彩 呢到夜晚8點有煙花表演 所以唔需要太早入場 就可以睇埋煙花先離開 點擊圖片放大 晚餐我地選擇左酒店既企鵝自助餐 5:30準時入座 唔需要訂位 其實餐廳超大冇可能冇位 唯一要爭既係與企鵝食晚餐既位 顧名之意係可以近距離望住企鵝 自助餐食物種類算多 味道還算可以 大概$300一位 其實都算超值!! 相冇影好多 眼掛住望企鵝 口掛住食野 冇時間影相lol 晚餐時間由5:30至21:30 期間任食冇時間限制 加上人唔算多 總體而言：幾好! 香港咁既價錢唔會有咁既體驗 點擊圖片放大 食完差唔多8點可以睇埋煙花 由於我地門票係一次性 所以只好係園外睇 不過氣氛依然好好 幻彩耀長隆 煙花睇完 水舞間又睇完 係時候番房好好休息一下 抖足精神第2日既馬交行程 下回：兩女閒遊馬交
