第二次離開石屎森林既遠足旅程 自從上次行過馬鞍山效遊徑 我愛上了呢種郊遊活動 之前天氣一直好濕 唔太適合我地呢D初級者行 今次阿盧一班同事游說佢舉辦遠足活動 所有行程 路線由佢包辦 只要舉手參加就可以 浪茄及萬宜東壩 難度：3*(5*最難) 9公里 需時：5小時 交通：由西貢市中心出發 搭的士去東壩(約$105) 行裝準備 今次屬於遠足路線 全程石屎路 所以衣著方面唔需要太專業 運動內衣；短䄂T-shirt；運動褲(透氣)；波鞋 其他裝備 由於天氣熱問題 最好帶2大枝水 我知道好重 但經過今次經歷 水係好重要 食物方面 可以帶幾個水果 解暑解渴 除咗急救用品 毛巾都係必需既 當日我地10:00係西貢集合 一行10人向⋯的士站出發 因為發現原本計劃既行程太長 姐姐們怕太辛苦 所以就決定撘的士入東壩行出黎 只行單程路線 始終都係女人比較細心 經過$105既的士路程終於到達東壩 一落車清新既牛屎味空氣撲面 面對住平時係石屎森林見唔到既 大海，山，水壩 腳踏住佈滿牛屎既石屎地 遠足mode即刻turn on 沿住大斜坡落就去到堤壩 呢到既景色平時就算去到沙灘都唔會見到 我呢啲石屎妹真係見識少 遠處見到有一個水濂洞既山洞 決定要過去探下 冇一條正式既路行入去 需要攀爬側邊既石 第一次爬石 心情好亢奮好驚 (應該係唔prefer人爬入去 但路係人行出黎 唔行多啲點會睇到多啲呢？) 記得都係小心為上 玩完個壩係時候開始行番出去 太陽出來了 又熱又曬 係時候要脫衣喇 (Sport bar大派用場) 一行十人一齊行 欣賞周圍景色 傾下計笑下 呢到既水係藍色 有啲清到可以見到底 冇諗過香港原來都有藍色既水 去到第一個休息點 坐下食水 繼續進發 太陽愈來愈曬 水愈來愈少 腳愈來愈攰 行得愈來愈慢 笑聲都愈來愈少 誰不知原來行得一半都冇 第二個休息點 要食下水果解渴 個個都頹晒 縱使景色幾靚 猛烈既陽光令我地愈來愈辛苦 加上不停有車出入 避車避牛屎 真係苦上加苦 第三個休息點 開始出現慾望 想食菠蘿冰 雪條 幻想將所有凍既嘢而放晒入口 面對現實只好加快腳步 行出去搵士多或者小食店 行咗差不多4個幾鐘終於見到臨入黎路邊既士多 立馬衝去買枝冰凍寶礦力 未試過可以一下子飲晒成枝 最後決定行多幾步搵的士站出番去 一齊食完個車仔麵 醫埋肚就散band 雖然又熱又渴又攰 但同一班新認識既姐姐說說笑笑咁行下山 原來比2，3個人行係有分別 加上沿途既風景 值得值得！ Video's link is down below the picture, check it out!!!!! Instagram: eatplaylovene
