2014年12月收到一個原本以為唔會再有既消息 相隔8年 AIA嘉年華突然宣布重返香港 咁重大既回歸冇可能唔去呀？ 仲記得上上一次係小學生 上一次係中學生 今次已經係一個打工仔 記憶中第一次同屋企人去 玩乜都要代幣 所以可以買既野得好少 而第二次去機動遊戲唔洗代幣 冇束縛地玩成6,7轉過山車 唔知今次會點玩法呢？ 成人$100入場費 當中$70係代幣 冇錯! 即係換到7個玩1個機動遊戲都唔夠既代幣 N年一次 值得值得!! 地點係中環新海濱 即係果個新既摩天倫隔離 場地比印象中以前果2次大左 闊落左 最觸目既G-Force依然係到 抱住一顆舊地重遊既興奮心情入去呢個老地方 點知卻抱住失望既心情出番黎...... 今日機動遊戲 攤位種類少左 同時賣野攤檔多左 昔日必中公仔既拉繩抽紙袋既攤位冇左; 今日變左食錢夾公仔機仲多過流動廁所 昔日刺激吊腳過山車冇; 今日小朋友過山車就有 昔日中獎職員會為你歡呼熱情響鐘; 今日中獎職員黑面好似每送出一個公仔要扣人工 唔知係人大左少左童真;愈來愈難滿足 定係呢個歡樂地方愈來愈人性化? 最令人可惜 當年既熱情變左今日既黑面.... 當年既熱鬧變左今日既冷淡.... 今年攤位有玩 公仔有中 G-force有玩 逗留左2-3個鐘 再搵唔到原因繼續留落去 byebye AIA~ byebye 我既童年~
