去旅行當然開心 當向身邊既人發佈自己去旅行既同時 你會發覺有人比你開心 就係一班三姑六婆 朋友同事 「啊! 去韓國?幫我買面膜」 「哇! 去日本?幫我買限量版波鞋」 「噢! 去美國?幫我買個coach袋」 「吖! 去台灣?幫我買洪瑞珍」 呢個時候你最需要既係一張shopping list同一個大行李箱 等等!停一停!諗一諗! 究竟我去旅行玩定做代購? 究竟我應該當手信送定收番佢地錢? 究竟應該點開口問番佢地拎錢呢? 其實買手信同做代購只差一線 如何將呢2回事分開又做得好好睇睇? 1. 價錢 你話我市儈?對唔住 現實係殘酷既 價錢貴:名牌包包; 潮牌衫褲鞋; 貴價護膚品/化妝品 連自己都買唔落手既野 又點當「手信」比你? 解決方法: 收據連貨物一齊比佢 對方見到張單 都識自動自覺比番錢你啦~ 2. 重量/體積 其實去旅行帶一個行李一個袋已經好極限 寄倉行李又限重 去旅行緊係想輕輕鬆鬆 買到一袋二袋走難咁款 都幾陰公 解決方法: 「量」力而為 「行李冇位, 不過都幫你買左少少」 比對方感覺你已經盡所能滿足佢 只係行李唔爭氣 唔關我事 3. 擾亂行程 好多人去旅行都會出現唔夠時間用既情況 基本上晚睡早起 仲辛苦過番工 務求以幾日時間行晒全部景點 講到咁 唔係仲好意思叫人特登兜路幫你買呢買路呀? 解決方法: 「哎呀!唔經呢頭 不過睇下會唔會有時間兜過去再幫你買啦~」 講定先就算買唔到 人地都冇得入你嘛 好彩自己暫時都未試過做「代購」以上既都係所見所聞 其實去旅行大前提都係想放鬆下 體驗下 而唔係做苦力 手信視乎心意 貴精不貴多 小小飾物; 當地特產係最適合 記住人地買手信比你係bonus 而唔係必然咖~
