純粹因為無聊嘅關係,Weekend就帶埋個仔去左中環孫中山紀念館行下 (因為我自己都未去過)。初頭諗住個仔都一定會嗌悶,點知到最後係佢自己玩到唔捨得走! 去程我地搭地鐵去西營盤(C出口),再轉8號綠Van去孫中山紀念館。 如果對歷史無興趣嘅,當係去睇超級豪宅嘅示範單位都係一個唔錯嘅活動。 响露台望返出去嘅景都幾靚嘅,當然行埋入室內就知咩叫超級豪宅啦! 另外,呢個就係令我個仔玩到唔捨得走嘅電腦遊戲,係關於一啲歷史同埋文化嘅Mini Game,都幾得意嘅。 玩玩之後我地一家三口就慢慢行返落中環,因為我地好少帶個仔出港島區,所以佢每樣嘢都覺得好新鮮,特別係啲斜坡同埋樓梯佢覺得好好玩。 我地行到半路就入左Burger King食啲嘢,我個仔仲話: 呢度好正呀,可以對住條馬路,一路食嘢一路睇住啲車經過。 食飽繼續出發,因為沿路都有好多特色嘢嘅,邊邊行邊玩,唔覺唔覺就好快咁一路行到出中環碼頭喇。 最好彩嘅係當日嘅天氣真係好好,回程撞正黃昏時分,我地搭船出返九龍嘅時侯個天色真係好到不得了。 出嚟玩左大半日,如果唔計搭車食飯幾乎無用過錢,但係我地都真係玩得幾開心嘅,無事一家大細四圍行下,算係賺左個開心嘅Weekend啦! 實用資料 入場: 免費 (如果想有人介紹的話,可以夾啱佢地嘅導賞服務時間先至去參觀啦) 地址: 孫中山紀念館位於香港中環半山衛城道7號 星期一至三、五:上午10時至下午6時 星期六、日及公眾假期:上午10時至晚上7時 聖誕前夕及農曆新年除夕:上午10時至下午5時 星期四(公眾假期、孫中山先生11月12日誕辰及3月12日忌辰除外)、農曆年初一及二休館 https://www.lcsd.gov.hk/CE/Museum/sysm/zh_TW/web/sysm/aboutus/intro.html