面膜係我既保養人生中確實係日日都要敷，可能你會話唔係嫁，面膜唔可以日日敷嫁，但其實係可以，只要你每日敷既係唔同功能既面膜！今次我就要同大家介紹一下我日常用開既面膜，同時亦都係不同功能面膜中我既推介，價錢亦都十分合理既，係我既私心大分享呀:) 【清潔面膜】Swisse Manuka Honey Detoxifying Facial Mask具備Manuka Honey成份既清潔面膜，所以敷完一點都唔乾，性質亦都溫和，每次敷完我都覺得好乾淨，仲有點潤既感覺，塊面即時亮白左，但並唔係美白左，而係乾淨左淨白既感覺，毛孔馬上呼吸暢順既感覺！我通常會全臉敷，唔會敏感，可以放心，但佢乾得好快，我通常一乾哂就會洗左佢，唔會理時間，清潔力已經好夠！最令人中意既係佢只需要$99，萬寧就可以買到啦～ 【保濕面膜】effusais Skin Version Up Mask係遇到依隻面膜後，我先明白到咩叫做有效既保濕面膜！依塊面膜唔算好多精華，敷時亦唔會有超多精華好濕潤既感覺，但會有涼涼地，皮膚吸收緊既感覺，而一敷完拎走張面膜，照下鏡，你真係會見到塊臉係補左水，毛孔同乾紋都有變淡既效果，同埋皮膚有變軟既感覺！依種即時既效果係我用過咁多保濕面膜中最顯著由於我係極乾肌，用其他補濕面膜後我都會再搽精華先覺得夠，但依款面膜敷完已組好足夠，我只需要再用面霜鎖水就得啦～～ 【紓緩面膜】Dr.Jart+ Soothing Hydra Solution Deep Hydration Sheet依款面膜推介係曬後或皮膚敏感後既紓緩用！我好耐之前試過一次唔小心用左有果酸既產品，然後皮膚係敏感到要睇醫生，個段時間一直冇敷面膜～而依一款面膜係好返後第一款用既面膜，面膜精華既質地比較輕透、溫和，可以做到好好既紓緩效果，幫助皮膚慢慢好返，每次曬完或較敏感既時侯我就會用依款，因為一定唔會令皮膚再敏感落去，同埋唔會對皮膚造成刺激！ 【美白面膜】Kose Babylish Mask Clear Turn 7回用好多人都問我買邊種美白面膜，而我都會好老實答係冇一下用完就白既面膜，個d即時敷完變白既面膜好多時第朝起身就已經無左，而長期敷完變白既，係因為你勤力敷，夠補水夠頻密，所以變白，唔關塊面膜事！所以通常大家問我買邊種美白面膜，我都推介依款BB Mask，每日敷大約10分鐘、連敷7日，你會發現兩頰明顯會有彈性，同有光澤左，雖然佢紙質比較薄，精華唔算多，但勝在佢夠平，同埋可以提提自己要用7日要勤力！建議可以係敷前搽一層美白精華，然後再敷面膜，等塊臉可以吸收多點美白精華，依個方法係我暫時用過最好最平既美白面膜方法！ 【去黃面膜】Canvas Detox Facial Mask依款面膜係去黃方面的確幾有功效，因為有時夜訓，身體多左毒素，皮膚真係會變黃同暗沉，而依款面膜係有排毒既功效，使用時除左全臉敷外，仲要敷埋下巴同頸既位置，因為下巴同頸既位置有唔少淋巴位，敷埋可以幫助通淋巴，加上佢有少少清潔同收毛孔既功效，用完會感覺皮膚乾淨左、氣色好左，如果你皮膚唔係太污糟既，可以當埋清潔面膜用，每星期敷2次到就得啦～唯一缺點係佢都幾貴，要$695，但我都會持續回購，因為佢既效果值依個價錢！ 【緊緻面膜】fresh Black Tea Firming Overnight Mask由於我係極乾肌，所以我係日常護理中除左日常既面膜護理外，我仲會每晚再使用Sleeping Mask！我中意fresh依款晚間面膜既最主要原因係佢做到緊緻，用左佢之後皮膚明顯係firm左，拍打時亦明顯有彈性！加上佢既質地好舒服易吸收，唔會黏笠，即使用哂所有晚間護膚品後再用埋都唔會痴枕頭！我亦十分推介俾年輕點比較懶既女仔，平日唔中意懶敷mask既隔晚敷依個，亦都可以基本保養到皮膚同抗衰老，暫時我推介俾咁多朋友都冇負評過呢！ 【全效面膜】 Valmont Prime Renewing Pack貴婦級既面膜，$1800一瓶既面膜，但佢可以做到所有你需要既效果，包括潔淨、保濕、滋養、美白、緊緻等，用完皮膚即時已經可以見到效果，連續長期使用，日日薄敷，唔駛用其他面膜，皮膚都一定會變靚！如果你係有一定既經濟能力，喜歡護膚，想皮膚有明顯變靚既效果，所以能力許可既依款面膜係絕對推介，不能錯過～加上佢高級既氣味，敷時都幾享受嫁！ 希望大家中意我既分享歡迎任何合作❤試用❤出席活動❤Email :emmama__2@hotmail.comFacebook : https://www.facebook.com/emmalovesbeautyInstagram : lny_emmaBeautyexchange :http://www.beautyexchange.com.hk/blog/emmama__2The Ztyle : http://www.theztyle.com/?80365SHE.COM : http://blog.she.com/emmama2/Elle : http://blogs.elle.com.hk/emmama2/UBlog : http://blog.ulifestyle.com.hk/blogger/emmama213/免責聲明**以上產品為自購產品 意見屬個人試用後分享**
