台式飲品店愈開愈多 ， 台灣本土既台茶亦都紛紛黎香港開店， 當中黑糖珍珠鮮奶更加係重點飲品！ 為左一杯黑糖奶奶，大家閒閒地都排成個鐘， 我都好中意飲，亦都排過唔少隊！ 但為左可以短時間內飲到更多， 我開展左我既台灣黑糖奶奶之旅！ 以下我會以黑糖、珍珠、奶味、冰感黎分享一下， 排名係由我覺得普通至最中意黎排列， 事先聲明我係重口味人仕呢～～ 歇腳亨 HK$30.00 【黑糖】 黑糖漿太少，混合奶後只有鮮奶味 【珍珠】 有十分微既黑糖味，質感係一貫歇腳亭既彈口有嚼勁 【奶味】 普通鮮奶，可另加奶霜，以豐富口感 【冰感】 冰塊大塊，夠凍，但飲到最後會沖淡左味道 【評語】 實屬普通，我覺得佢普通既珍珠奶茶仲好飲， 如果黑糖鮮奶都可以用混珠既，會加分好多！ 士丹里 HK$25.00 【黑糖】 黑糖漿唔夠，只有底部既少少，混合左之後完全冇味 【珍珠】 珍珠未夠入味，只有表層有少少黑糖味 【奶味】 奶味淡，而且稀身 【冰感】 太多冰了，凍呀但杯野好快飲完 【評語】 超級NORMAL！勝在最平！ Scaredy Cat HK$24.00 【黑糖】 掛杯賣相不錯，黑糖味較淡 【珍珠】 較為大粒，有咬口，略為唔夠軟腍 【奶味】 用左德國鮮牛奶，口感幼滑，奶味較日本奶淡 【冰感】 適中，凍得黎唔會破壞左奶味 【評語】 一向都係佢既Fans，飲得出店主用心製作每樣飲品， 雖然佢既黑糖奶奶係云云之中唔算突出， 但勝在價錢十分相宜，亦都係清淡之選！ 幸福堂 HK$30.00 【黑糖】 人手炒煮黑糖，有微微炙燒香氣 【珍珠】 每粒珍珠都沾滿黑糖，滲入珍珠內部，十分入味 【奶味】 台灣使用之鮮奶較淡，奶味唔重 【冰感】 使用碎冰好快溶哂，唔太夠凍 【評語】 幸福堂我係係饒河夜市飲既，對佢既評分一般， 奶太普通，唔夠香濃，整體感覺好淡， 黑糖漿較稀身，唔夠凍，幸好珍珠入味彈牙， 加返少少分啦，希望香港改用明治奶啦～ 鹿角巷 HK$28.00 【黑糖】 黑糖味道唔算突出，份量唔夠多，欠缺炭燒香味 【珍珠】 大大粒，外軟夠腍身煙韌，嚼落好香甜 【奶味】 香濃幼滑，富奶香 【冰感】 冰塊大粒，冇咁易溶，整體夠凍 【評語】 鹿角巷係我第一杯飲既黑糖珍珠鮮奶， 最中意佢第一下未混合時既黑糖味， 混合後味道都好match，唔會太膩， 但佢致命既缺點就係排隊要排好耐！ 良辰吉時 HK$36.00 【黑糖】 黑糖份量十足，掛杯賣相相當吸引，杯面灑上黑糖粉，有炭燒香 【珍珠】 珍珠入味，份量多，足足1/3杯，大粒彈牙有口感 【奶味】 厚身既奶，十分Creamy，飲到最尾都仲係好香濃既奶香 【冰感】 利用碎冰加奶打成，份量較少，略為唔夠冰凍 【評語】 份量十足濃厚，飲完都幾飽下， 建議選擇加冰，整體會較冰凍， 飲落亦都冇咁膩， 價錢略為貴左一點點～ 春風撞奶鋪 HK$29.00 【黑糖】 份量適中，有掛杯賣相，拌勻後仍然有黑糖香，甜度剛剛好 【珍珠】 煮得夠軟腍，外層煮到微微溶既口感，能夠抓住黑糖漿 【奶味】 名治奶，幼滑夠奶香 【冰感】 大大塊夠冰感 【評語】 係我依個元朗人既福音，仲唔駛排隊， 賣相味道都滿足到我隨時既口痕， 欣賞佢拌勻後奶味中仍有啖啖黑糖香！ 一芳 HK$30.00 【黑糖】 份量夠多，入口黑糖味十分濃 【珍珠】 細細粒有咬口，珍珠被黑糖煮得十分香口 【奶味】 鮮奶幼滑，淡淡乳香 【冰感】 冰塊大粒，夠哂凍唔易溶 【評語】 每日限量，中意佢甜度剛好， 飲哂都唔會好濟！ 品茶六境 HK$27.00 【黑糖】 只係掛杯，底部份量較少 【珍珠】 煮得夠腍身，但黑糖味唔夠重 【奶味】 經調配，比一般鮮奶香濃幼滑，乳香重 【冰感】 大大粒唔易溶 【評語】 前身係Want to drink既店址， 本想試Want to drink但去到見轉左鋪名， 但一場去到都試一試，結果冇令我失望， 特別係佢既奶香，十分香滑可口， 即使好飽都忍唔住要飲哂佢！ 珍煮丹 HK$30.00 【黑糖】 香氣濃郁，甜而不膩 【珍珠】 珍珠彈牙有口感，即使放入雪櫃雪左一陣，仍然十分彈牙 【奶味】 奶味較淡容易入口，混合黑糖後味道會較濃 【冰感】 碎冰，夠凍，但亦溶得較快 【評語】 可自由選擇冰感同甜度， 自主性會較高，適合香港人中意少甜少冰， 珍珠每日煮每日賣，愈食愈香口， 如果香港唔駛排隊既都係唔錯既選擇！ 陳三鼎 台幣40(約HK$10.38) 【黑糖】 黑糖味濃郁，炭燒香氣，有一股傳統既味道 【珍珠】 軟腍腍好嚼口，粒粒都有黑糖香，會忍唔全不停嚼 【奶味】 奶味較為普通，唔算十分特別，但混合黑糖後能飲到黑糖香 【冰感】 碎冰夠凍，份量亦足夠保持冰感 【評語】 黑糖珍珠鮮奶既始創店！ 黑糖一路煮住，杯底即時仍可以感到熱熱既黑糖溫度， 杯較薄身，所以小心唔好燙親， 黑糖味濃郁，同冰凍既鮮奶形成好大對比， 先飲黑糖再飲奶，最後攪拌飲用， 一杯可以飲到三種感覺， 而且價錢十分平，可惜只有台灣只此一家， 黎緊去台灣旅行既就千萬唔好錯過啦～ 老虎堂 HK$30.00 【黑糖】 掛杯掛得滿滿的，整體黑糖味香濃 【珍珠】 可自由選擇大珍珠或小珍珠，煮得十分香軟 【奶味】 可加奶泡，奶味口感十足，十分幼滑 【冰感】 大大塊既冰塊夠哂冰凍 【評語】 整體而言係我最中意既黑糖珍珠鮮奶， 黑糖同鮮奶既味道都做得好好， 黑糖夠香夠多，煮到十分軟身， 又可以擇我最愛既小珍珠， 鮮奶香甜幼滑，入口久久仍存有奶香， 係台灣時真係忍唔住一日一杯， 希望有一日香港唔駛再排咁耐啦～～ 不過即使要排都會忍唔住要飲一飲呀！ 【溫馨提示】 黑糖珍珠鮮奶真係好好味，而且真係好肥， 特別係肚腩仔既位置，所以一星期一杯到就好啦～ 希望依篇分享可以幫到大家搵到自己既口味， 如果仲有其他好推介既，記得分享俾我呀～～ 希望大家中意我既分享 歡迎任何合作❤ 試用❤ 出席活動❤ Email : emmama__2@hotmail.com Facebook : https://www.facebook.com/emmalovesbeauty Instagram : lny_emma The Ztyle : http://www.theztyle.com/?80365 SHE.COM : http://blog.she.com/emmama2/ Elle : http://blogs.elle.com.hk/emmama2/ UBlog : http://blog.ulifestyle.com.hk/blogger/emmama213/ 免責聲明 **以上評語乃個人口味及觀感得出，意見屬個人分享， 並不代表該品牌之言論及立場**
