山林道係尖沙咀中嘅一片靜土，短短一條小巷，內藏大量高水準店舖。 同接近半年無見面嘅朋友相約cafe傾計， 一開始誤會咗呢度係另外一間近名文青cafe，但梔子絲毫不遜色。 店舖裝修簡潔清新，單係行到門面已經深深愛上， 環境先獲得一百分。 點擊圖片放大 作為cafe，正餐、沙律、all day breakfast等應有盡有， 亦都不少香口小食。咖啡果汁等飲品以外， 原來呢度仲主打係不同酒精飲品， 手工啤酒、cocktail、紅酒、白酒，什至連sake都有， 兩個愛酒之人誤打誤撞黎左呢度十分驚喜。 「Eat Healthy, Play Naughty. 」嘅宣傳字句， 完全係餐點上呈現。 點擊圖片放大 +3 下午茶時段，仲係happy hour， 分別叫左店舖限定嘅Craft beer - 梔($68/HH)， 同有Craft Cider - Real Elderflower($68)。 梔子，以另一個名雞蛋花更為大眾熟悉。 東南亞地區隨街可見， 原來用黎釀製啤酒，味道清香甘甜，減去麥啤嘅苦澀， 女仔都十分適合飲用。 朋友就係不太喜好啤酒，改點來自蘇格蘭嘅Cider， 卻表示雞蛋花啤酒都十分對味。 Cider比起一般飲到的甜，更易入口， 充滿果香之餘，原來接骨木花花香如此清幽。 下酒小菜，點左芝士蘑菇釀雞翼($68)。 脹卜卜嘅焗雞翼，外皮香脆， 內藏香口嘅流心芝士同蘑菇粒， 加上啖啖雞肉，令人食指大動。 飲酒之餘，都要注重下健康，叫左雞肉藜麥沙律($108)。 沙律用鐵桶上枱，感覺清新又驚喜。 相機食先嘅呢個年代，賣相又係先奪得滿分。 沙律用料之多，連menu上無列出嘅蔬果都有， 樣樣都係時下流行嘅super food， 包括牛油果、禮物、羽衣甘藍等等， 十分健康。灑上果仁同黑醋，味道同口感非常清新。 是日蛋糕只剩Chocolate Truffle Cake($58)，當然要試。 香濃朱古力味，甜度適中，香軟滑嫩。 簡單如揀選餐具、托盤，呢度都別出心裁。 見微知著，令食客更覺窩心。
