唔知大家有無係聽過日本紅極一時嘅吉列牛扒， 外層炸得香脆，但入面嘅牛肉仍然係全生嘅。 食客可以直接加wasabi享用， 又或者將牛肉放係烤爐上面微微烤熟，再配上唔同醬汁食。 為左呢個吉利牛，我都係東京嘅寒風之中， 同當地人都一齊排左成個鐘隊。 香港確實係美食天堂， 估唔到短短兩年嘅時間，吉列牛已經殺到黎香港。 男朋友知道又嚷住要試下，咁好味嘅野食當然要一食再食。 跟住地址搵到黎 旺角726號大廈， 原來係一棟翻新完，接近全棟都係食肆嘅大廈，附近打工仔真有口福。 電梯17/F嘅餐廳標示只有韓文，即時心生疑惑，我地唔係去食日本野咩？ 上到去，終於見到吉列牛忌廉烏冬等字眼，知道無黎錯。 睇餐牌，先發現我地一直誤會左呢間係純日式餐廳。 Kobekyu呢個名，你未必記得， 但提起首爾美食，相信愛吃之人對早前風靡一時， 用厚厚一層白色忌廉鋪面嘅忌廉烏冬必有印象。 老實講，我當時只係被果層忌廉所迷惑， 無留意到呢間店舖另一主打吉列牛。 哈哈，我地誤打誤撞，就上到黎試晒兩款美食，正啊！ 餐廳深深明白，大家上黎都係想食主打嘅兩款食物， 提供左幾款嘅吉列牛set俾大家選擇。 我地叫左Set 2: 吉列牛+ 咖哩忌廉牛肉烏冬+2汽水 ($246)， 再外加一客kobekyu秘製蛋捲 ($68)。 識日文嘅朋友應該留意到店名kobekyu，即係神戶牛咁解。 不過店舖採用嘅牛肉並唔係和牛， 而係一樣牛味香濃，更有咬口嘅美國牛肩脊。 吉列牛分量都幾多，外層係薄薄一層麵包糠，炸得香脆， 入面嘅牛肉肉質鮮甜味美。 喜歡生食嘅朋友可以直接蘸上wasabi， 喜歡熟食嘅朋友，可以將牛肉放上小火爐，隨自己喜好烤到幾多成熟。 點上醬油或者蒜蓉沙律醬，更帶出牛肉嘅風味， 用黎送日本米飯，一流！ 吉列牛定食精緻，有芝麻醬豆腐、小蕃茄同沙律菜，減輕油膩感。 不過個人認為，吉列牛炸得剛剛好， 跟本就唔油膩，食到停唔到口。 點擊圖片放大 一開始掛住影相燒得太熟，短短十秒就夠架喇！ 咖哩忌廉牛肉烏冬，賣相獨特，用一層厚厚嘅忌廉鋪面。 將兩者撈勻，可見忌廉十分掛麵，食落更加香滑有口感。 忌廉睇落厚身，但撈勻之後發現， 佢creamy得黎食落又唔會好滯，兩個人分享剛剛好。 Kobekyu秘製蛋卷，蛋卷內層係流心芝士， 絕對做到備受芝士控吹捧嘅拉芝效果。 蛋卷嫩滑，同樣地可以配上蒜蓉沙律醬， 但呢個沙律醬更加入左wasabi，味道更突出。 一間餐廳，可以試勻兩款美食， 再加上小食都十分出眾，價錢方面亦唔算特別貴。 我地午飯時間去到，十二點剛剛開舖無咩人， 但短短半個鐘內已經坐滿八成， 建議大家最好都係一早book定枱。
