散水餅食得多，貴價如酒店出品嘅有，平價如連鎖麵包店都有。 又有同事離職，比較熟絡嘅分得一件較為精美嘅法式撻。 一試難忘，問一問朋友，原來係上環嘅一間小店，但亦都可以經網上訂購。 早排約左朋友係上環食晚飯，飯前兩個愛吃之人就根據指示搵到黎呢間Tartes & Pop 。 店面的確不大，位於轉角位置亦唔錯起眼，openrice卻係清一色好評。 兩個人揀左四款tartes ($45/件)，舖頭入面都有三數位置可以坐底享用。 法籍師傅十分細心，明白香港人相機食先嘅習慣， 先將撻放上黑膠碟，拎左出黎俾我地影相，再主動幫我地將啲tartes切為兩份。 師傅亦都建議我地由淡味食到濃味，更俾左杯水我地，清一清味蕾。 我地先食嘅係vanilla strawberry，亦都係我嘅最愛。 面層嘅士多啤梨果醬同士多啤梨啫哩，甜甜酸酸味道剛好。 下面嘅係加入vanilla整成嘅cream， 重點係上面撒左少少青檸碎，令味道更加清新，夏天食真係一流！ 最底層係自家製嘅crumble餅底，口感crunchy鬆脆，配上vanilla cream，非常夾。 第二款食嘅係coffee cream brûlée。 呢件係另一款更為扎實嘅shortbread撻底， 為免上面cream brûlée嘅濕氣令撻底無咁鬆脆，中間特別加左一層海綿蛋糕， 蛋糕係杏仁口味，唔會搶左咖啡同cream brûlée嘅風頭。 呢款蛋糕睇落無乜特別，但入口後果陣濃郁嘅咖啡味實在驚喜十足。 靚仔師傅周不時過黎問我地感覺如何，傾落原來佢地將咖啡豆加入custard中， 浸出咖啡味後再取出咖啡豆。如此花心思嘅做法，私心俾左一百分。 Cream brûlée自然相對其他撻較為甜，但又唔會好膩，真心好正。 茶味嘅撻相對較濃味，所以最後至食。先食嘅係呢款Orange Earl Grey。 Earl Grey 味道無我想像中咁突出，帶淡淡茶香。 內層嘅夾心香橙果醬又係驚喜之作，粒粒橙肉口感香甜特別。 撻底繼續係我最喜愛嘅crumble底。 最後，亦都係最好賣嘅Sesame Matcha。 收銀機一旁，擺放出宇治抹茶証明書，食材認真。 抹茶mouse十分香濃，配合上同樣濃味嘅黑芝麻， 兩者之間味道剛好取得平衡，好有層次感。 與撻底之間都係由一層杏仁海綿蛋糕相隔， 撻底即係朱古力口味，為偏向苦味嘅抹茶同黑芝麻帶黎一點甜。 抹茶係長青不老嘅食材之一，而呢款抹茶撻都同樣成日大多數人嘅最愛。
