過去1個月都慘慘豬嘟嘟病了 事源黎活節期間，嘟嘟發燒了，本身諗住都唔係咁緊要，因因BB仔不時都發下燒長高，但半夜燒到39.4，即時嚇死媽媽我，諗都唔諗即時叫醒老公搭的士入院 即時搵電話打晒去問私家醫院，原來半夜係無兒科醫生嫁，咁就直接衝去瑪麗喇，但經過今次嘅經驗，我諗我之後都會選擇去返瑪麗，比起之前去聖保祿好好多 我哋大概5:30am左右去到瑪麗急症室，唔係好多人，大概10個等緊，登記時先發現太匆忙，連出世紙都冇大，不過可以後補，等唔夠10分鐘就叫到我哋啦 首先係姑娘幫嘟嘟探熱，了解情況。 知道係發燒之後要喺隔離區等，等左10-20分鐘左右啦，見醫生，醫生話因為發燒，但係因為胃口變差左，擔心會脫水，所以都建議我哋入院檢查穩陣啲。 上到兒童隔離病房，當值醫生再有詳細檢查。然後就安排床位比嘟嘟啦。同房總共4個小朋友，除左我地，仲有個3個月BB，9個月BB，同埋歲半小朋友。。入到房時都未到7:00am，都真係算好快啦。 好快有護士呢安排要抽血同驗鼻涕，搞到嘟嘟豬又要喊一輪 兒童隔離病房，冇探病時間，只可以一位家長陪同，仲要着住保護衣，初時真係有啲嚇親我，搞到好似好嚴重咁唔知咩事。 好好彩，嘟嘟幾個鐘入面都非常合作，有咩扭計，坐喺床到自己玩，仲引埋啲姑娘過嚟同佢玩添，一啲都唔似病緊 今次瑪麗醫院嘅體驗，感覺真係好好多，經常都有好多醫生護士來做檢查，解釋情況，唔同上次喺聖保祿，好似自己係間房到唔知發生咩事咁，仲同隔離床嘅媽媽有偈傾添 好快2:00pm就出左報告，證實左係合胞病毒，醫生解釋話係上呼吸道感染，要等BB自我抗禦，然後就建議我哋返屋企休息，4:00左右我地就返左屋企啦
