睇電視就睇得多啦，但親身到薰衣草園參觀都係第一次。雖然錯過咗最燦爛嘅䦕花期，但我女友依然玩得同買得好開心。呢度差唔多同薰衣草可以扯上關係嘅嘢都有得賣，咁大個仔都冇諗過要食薰衣草雪糕，但人一世物一世，乜都要試吓，但食起嚟又OK喎。 食咗雪糕當然要做番吓運動啦，所以下晝就沿著個 Okanagan 湖踩單車，沿途經過個沙灘同埋無數嘅海邊豪宅，真係大開眼界。 點擊圖片放大 原來除咗陽光與海灘之外，呢條路上仲有幾間好有名嘅酒莊，咁當然就唔可以走寶啦。試吓試吓好快就過咗個下晝。飲咗酒後就當然唔可以醉踩啦，所以個個就乖乖地上番支援車，點知就出事囉。領隊哥哥見到我哋都應該有番d嘢落肚，所以就車咗我哋上山去間好正嘅農場，一落車就見到羊兒通山走，原來係間山羊奶製品專門店，佢哋除咗芝士之外最出名嘅就係雪糕。呢次慘囉，一日食兩輪雪糕，但係消耗嘅熱量又唔係咁多，不過出得嚟旅行就要括出去，鬼叫杯雪糕咁 creamy 咩，一於食咗再算，等聽日再减肥啦。 食咗咁多餐西餐都想轉換吓口味，所以聽到領隊話今晚有中餐食，心裏面真係又驚又喜。驚嘅係依我嘅經驗，喺d town 仔嘅中餐通常好難食，但既然叫得做美酒佳餚單車團，相信俾個胆佢都唔敢帶我哋去食 Chinese buffet 啩。結果真係喜出望外，原來大廚 Andrew 哥係由温哥華入嚟嘅過江龍，就係一味咕嚕肉就睇到佢嘅真功夫同埋對烹飪嘅認真。不單止個粉漿做得好薄、肉質鮮嫩之外，個甜酸醬仲係用山楂製成，唔係平時食開紅噹噹、杰撻撻嗰種，真係食到個個嘴舐舐。 點擊圖片放大
