話晒都係單車旅遊吖，所以飲飲食食之餘，都係時侯踩番吓單車囉。今日嘅目的地就係大家期待咗好耐嘅 Myra Canyon。我哋呢班享受第一嘅單車友當然唔會踩上山啦，咁辛苦為乜呀？ 所以大隊就沿著條 Mission Creek Greenway踩，條單車徑上人少之外，路面又平又闊，係個熱身嘅好選擇。話明係 Mission Creek, 當然係跟著條溪踩啦，沿途都係樹木，所以風涼水冷，踩得好舒服。 條路又平又闊唔係唔好，但踩到咁上下都想有番d小小嘅挑戰嗎。好彩當大家都習慣哂架單車嘅操控時，條路開始收窄，兼且變得迂迴曲折，喺樹林中穿穿插插，沿途又要走過三條木橋，大家都話踩得好過癮。 踩得餓餓地就到附近一個 golf club 食午餐，坐喺個 outdoor patio 上一邊食一邊睇着人打波都幾唔錯。 好彩有部支援車，唔係都唔知點上去 Myra Canyon 囉！要喺條碎石路上爬成千幾米，坐車都要成半粒鐘，我自問就冇咁嘅本事踩到上去喇。 真係聞名不如見面，Myra Canyon d 風景的確好靚，比起相片所見更加靚。天空上萬里無雲，襯托著陡峭嘅山坡，而山下遠處就係 Kelowna 市。 條 trail 的確好平好容易踩，但最過癮就係過嗰十幾條依着懸崖而建嘅火車橋。企係橋上面向下睇，腳下就係幾百米深嘅深谷，好彩我哋冇畏高症啫，雖然係完全冇危險，但係都有d腳仔軟。最難得嘅係見到一對鹿母子，當時鹿媽媽想帶啊仔過橋，但我哋就啱啱喺條橋嘅另一端，人鹿爭路之下，佢哋諗下諗下都係調頭走為妙。
