上回講到我同女友都愛上咗單車旅遊，所以去完洛磯山踩車之後就計劃好要返嚟再玩過。今次襯9月份過嚟温哥華開會，就拉大隊到 Okanagan 玩餐飽兼歎葡萄酒。 今次其中一個主要嘅景點係條 Kettle Valley Railway Trail。 聽講條 trail有成600 㡬多公里長，玩哂要好多日。因為其他 friends 都係第一次玩單車旅行，所以我哋就揀咗跟 Roadrunner去風景最靚嗰段 Myra Canyon 作為試點 其實條 trail 最適合新手玩，因為係由火車路改建而成，所以主要都係平路，只有少少暗斜，再斜d火車就行唔到。 大隊由温哥華出發，坐咗4粒多鐘車就到 Kelowna，喺個酒莊嘅 patio relax 吓，食個 lunch 後就開始我哋今次嘅葡萄酒之旅。 第一站係去山頂上面嘅 Mission Hill 參觀，d建築物十分型，好有 Napa Valley 嘅西班牙風格，到處都擺放著d藝術品，又有個鐘樓定時定候為大家報時，再加上一個270度嘅靚景，真係靚到暈！ 大會更加安排咗我哋入去酒窖參觀，兼且有専人講解當地葡萄酒嘅特色，幫我哋之後嘅試酒行程打定底。 Mission Hill 雖然係大酒莊，有大路嘢之外亦都有d細 batch 嘅精心製作，水準十分之唔錯，所以都贏過唔少嘅大奬。跟著就去附近規模較細嘅酒莊參觀，佢哋各有特色，加上部份出品外面買唔到，所以較得我哋嘅歡心。
