今日係我女友最期望嘅日子，因為 Lake Louise 出名浪漫，好多人選擇响嗰度舉行婚禮。但估唔到未到 Lake Louise 就已經有兩個驚喜。 第一個係 Peyto Lake, 唔親眼見過都唔相信可以靚成咁。喺山上望落去，呢個湖竟然係星形，而湖水就係一種好特別嘅粉藍綠色，我都唔識形容咯，睇相啦。領隊話湖水要光線配合先至會呈現咁靚嘅顏色，所以計好哂時間先帶我哋嚟睇，認真多得佢嘅細心。 另一驚喜係 Bow Lake，水面平到鏡一樣，返映到環抱嘅羣山，壯麗中又帶點優雅，又係形容唔到咁正！湖邊又有間鮮紅色屋頂嘅古老建築物，令影出嚟嘅相更加精采。 踩單車方面真係越嚟越容易，連我女友都應付自如。唔駛講梗係自己 fit 咗啦，而路程大部份時間都係落山亦係原因之一，再加上所有行李都上咗支援車，真係連水都唔駛帶多支，踩起上嚟就更加輕鬆啦。好快就去到 Lake Louise town 裡面我哋住嘅酒店，雖然呢個 town 仔真係好細，但勝在好近 Lake Louise 同 Moraine Lake，非常方便。 下午嘅節目當然就係遊 Lake Louise 啦！因為有太多選擇而大家又各有所好，所以領隊就放我哋兩粒鐘自由活動。好動同鍾意影相嘅我當然喺簡撑獨木舟啦，咁先可以近距離睇 Victoria Glacier 同埋用唔同角度影呢個咁出名嘅旅遊重點。之後當然要陪女友沿住湖邊散散步，浪漫一番啦。跟住仲走入去 Chateau Lake Louise 參觀，順便坐低飲杯嘢嘆番吓。Lake Louise 果然係名不虛傳！ 晚飯去咗一間無論裡裡外外都充滿濃厚 mountain chalet 氣味嘅餐廳，幾好氣氛㗎，相信自己旅行就未必揾得到。
