今日终於開始落山喇！我哋亦正式離開 Jasper National Park 進入 Banff National Park。起步冇幾耐就落個大斜，仲以為好爽，但領隊再三吩咐大家一定要慢同小心，因為踩得太快就好容易炒車，好危險。跌傷咗固之然以後嘅日子冇得玩，最驚係鏟咗出車路就大件事。其實只要小心d，咁嘅斜坡對我哋踩慣車嘅人根本冇乜難度。但我鍚身嘅女友當然係選擇坐支援車啦，講真有咗佢，我哋一班唔同技術程度嘅朋友都可以一齊踩車旅行啦。 大家逐漸發覺到 Banff 同 Jasper 無論在山勢或景觀上都各具特色，Banff 呢邊嘅山有多 d 樹木，而我哋好快就進入湖區。路邊有大大小小嘅湖點睇都咁靚，加上可以隨時隨地停低影相，所以度度都係 viewpoint，而且今日踩得都算輕鬆，可以話係過足癮。 不知不覺就到咗 Saskatchewan River Crossing。聽領隊講原來呢度有著好長嘅歷史，因為呢度係三條河嘅交滙處，所以早在百多年前已經係一個本地土著同白人做皮毛生意嘅中心，真係唔講唔知。 踩到 Mistaya Canyon, 見到ｄ好獨特嘅岩石，原來係被河水長年累月衝激而成，真係要慨嘆大自然嘅鬼斧神功。 今日嘅最後一站就係個風景優美嘅 Waterfowl Lake，絕對係個踩車後休息嘅好地點。對著咁靚嘅景一面拿著杯凍飲，一面食番d snacks 保充番吓，真係無以尚之！ 大隊入住嘅旅館有個好正嘅 bar可以俾大家喺個 outdoor patio上摸住酒杯底傾偈，又或者可以去 sauna 嘆嘆。最重要嘅係等咗兩日終於可以洗衫，因為環保關係國家公園裏面唔係度度都可以洗衫㗎。
