好多朋友都提議單車旅遊，但自問英文同踩單車嘅技術都認真普通，唔知道可唔可以應付到，所以一直猶疑不決。 最近竟然係網上揾到一個專為華人而設嘅單車旅行團，當然十分興奮啦。最開心係除咗唔會有語言障礙，沿途重有支援車跟住，真係跟唔上大隊都可以上車休息。負責人重話唔踩單車，淨係遊山玩水都得喎！就因為有呢個 option 先至氹到踩車技術同樣普通嘅女友同我一齊去，哈哈！ 我哋選擇咗洛磯山脈嘅７日行程。第一日由溫哥華直到 Jasper，車程成８粒幾鐘，諗落都有d擔心。但係原來行吓停吓、睇吓風景，時間都過得好快。加上有大把時間同d團友混熟，消除隔膜，咁第二日一齊踩單車都開心d啦。其中最大驚喜係去咗 Wells Gray Provincial Park 近距離欣賞大大小小嘅瀑布，真係好震撼好正！另外值得一提嘅係食 lunch 嗰間河畔餐廳，風景一流，加上食物又有水準，坐係佢個 patio 食吓傾吓，飲番杯凍飲就舒服哂。 點擊圖片放大 黃昏到達 Jasper，以為喱種遊客區冇啖好食，點知個團安排嘅日本餐又正宗又好味，原來d廚師同老闆都係日本人，一讚！領隊重話呢間日本料理嘅水準泊得住日本餐出哂名嘅温哥華，認真難得。 食完飯就各自行街買嘢，同時參觀吓呢個好有雪山度假村 feel 嘅小鎮。我哋酒店就喺幾條街外，自己到處走都唔怕蕩失路。
