活水和風食堂-長沙灣今日去左長沙灣食日本野, 活水和風食堂- 價錢親民, 野食質素比想像中高, 仲做緊午市85折, 同晚市9折 (即係免加一), CP值高一定要去試下! 我地去左食晚餐, 叫左照燒雞扒定食($62), 定食包左面豉湯, 中華沙律同埋雜菜沙律, 價錢唔貴但係份量都好足, 雞扒好大塊而且燒汁好多, 唔會乾爭爭, 用來送飯真係一流, 飯係日本珍珠米,就算撈埋燒汁一齊食都唔會太爛 (食過好多爛到一pat野嘅燒汁飯..); 另外要提嘅係面豉湯我地覺得好好飲, 面豉味足又唔會太咸, 唔似好多溝水開出來嘅湯咁 另外叫左天婦羅手打烏冬 (海虎蝦2隻+菜4件); 嗰晚食飯見到幾乎每枱都有叫天婦羅, 試過又真係物超所值! 天婦羅粉炸得岩岩好, 唔會好大陣油味, 一盤包左2隻大蝦再加左茄子南瓜等等嘅雜菜, 配合埋手打烏冬(食落幾爽口唔會太淋), 真係令人食過返尋味!我地另外仲叫左2碟串燒- 燒雞軟骨, 食落好爽口味道都唔會太咸, 每粒軟骨都好入味, 嫌鹽味太重可以擠少少檸檬汁,酸酸地味道更出! 汁燒帶子- 帶子唔算太大粒但係燒汁分佈都幾平均, 燒汁味道幾重我覺得偏甜, 佢另外有海鹽做調味料, 如果唔鐘意食太甜嘅人可以加返少少鹽, 用來送酒/飯一流! 地址: 長沙灣福華街571號曉悅地下3號舖長篇詳細食評!記住follow我地~一齊搵好野食!
