一直想寫前一排令我壓力急升嘅第一次買樓心得。話說上年家人鄭重咁交帶落一筆錢叫我買樓，嚇死我。唔好話買樓，買股票我都淨係識買穩陣收息嗰D。要我買樓喎，真係要嚴陣以待。 結果係我成功買左層銀主盤，低於市價，總算對屋企人有嗰交代。 一開始買嘅時候目標已經係租俾人，我真係做左好好好多research，對新手買樓都有左少少心得。其實唔係誇張，但真係要俾自己3-4個月心理準備+上網煲文時間，再用6個月至1年時間行動。想買到筍盤係要經過鋪陳先會成功，當然如果你咁好彩第一次睇樓就買到筍盤咁我冇野講啦。 首先，我會開始留意下樓盤，例如屋企附近D屋苑大概幾錢（行過地產鋪望下），上網睇下買樓心得。最好從你屋企附近樓盤開始，你熟呀嘛，附近交通、鋪頭你都知。好啦，經過地產鋪約左人又未夠鐘時我會是但入一間搵嗰 agent 帶睇樓。最好幾間龍頭地產都搵。 我當時蠢，搵開一個就諗住用佢，叫佢阿蘇啦。呢位阿蘇係一個中年女人，我屋企以前租樓夾過佢既，見大家幾好傾，今次睇樓都搵返佢。我一開始都左搖右擺咁諗左好多屋苑，但主要都地鐵上蓋，始終租樓：Location Location Location 最重要！所以唔考慮要從地鐵行超過15分鐘既屋苑。同埋我一定要屋苑，我新手買樓覺得買大型屋苑檼陣D，保值度比較高（流量高+將來賣容易D）。 講返阿蘇帶左我睇幾個屋苑，跨區既都有（佢會揾返同行既同事一齊睇，到時成事就拆佣）。後來都喺決定主攻屋企附近地鐵上蓋既屋苑，前前後後都睇左大半年。同埋睇樓時好容易墮入用家既角度，即係咁，好多人話租俾人唔洗理坐向、層數嗰D野。最緊要就係計回報率。 租金回報率計算方法： (每月租金x12) /樓價 x 100% Example: ($15000 x 12)/5,000,000 x 100% = 3.6% 3.4%係正常，如果可以去到4%就正啦！ 但始終我唔係經驗炒家，我都係穩穩陣陣目標高層靚則，坐向西南或東南。咁多條件，一定唔平啦。所以一定要係冇匙盤。冇錯，即係冇．得．睇．樓！一開始時覺得呢嗰念頭好難接受。但後來諗通左......老實講，如果係筍盤，D agents 都益左熟客先啦……咁點樣成為熟客？多數熟客係炒家，炒家們係完全唔會理有冇得睇樓，對佢地黎講，層樓只係一件貨物，唔洗理咁多，平就入貨！相傳炒家會留一疊簽好既支票俾 agent ，有筍貨就直接叫agent入票ga 啦！ 所以話，有鑰匙既放盤感覺就係D炒家揀剩既貨咁，先比人地慢慢睇慢慢諗。因為唔夠筍，無人掙嘛！當我諗通之後，我就努力咁同阿蘇friend D，仲放風我唔止買一層，仲講埋今次搞得掂，以後D租務、買自住樓、朋友買樓都搵佢ga 啦！等佢搏少少呀嘛。要俾一種我好認真既感覺俾佢，如果唔係D agent 以為你玩玩下，有筍貨都唔益你。同時我亦都好努力咁煲熟間屋苑既則、坐向等等。到時冇樓睇但agent一講就知嗰單位係點。 如事者，睇下睇下，睇到今年9月的時候，阿蘇打電話俾我:「Karma！有間唔錯的盤，2個月後退租，冇得睇。之前租都經我手，乾浄企理ga！可以睇隔離座同一坐向，同一層既單位。」唉，阿蘇，都入唔到去睇，你又點知乾淨企理呢？點都好，都去望下啦，嗰價錢算正常。 我捉埋YY一齊睇，去到，阿蘇喺外面指一指嗰單位，講：「可惜嗰業主得罪左個租客，依家嗰租客死都唔開門俾人睇，之前有幾個都因為咁唔買。」一問之下先知已經放賣左幾個月，先入為主硬係覺得有D問題，好的話一早比人買左。點都好，阿蘇帯左我地去隔離、既隔離嗰座......都好唔隔離喎大佬。上到去，嗰單位又殘又舊，仲有好多雜物留响度，我覺得好奇怪。阿蘇就講啦：「呢間呢，就係銀主盤黎，嗰業主按左層樓俾財仔（即財務公司，唔喺正式銀行），還唔起就申請破產。依家仲未判財主，所以未放得出黎賣。」一般來說，層樓可能會按左俾幾間財仔，到時等業主申請破產，法庭就會判層樓俾其中一間財仔。佢就有權賣左層樓黎填數，有剩先漏比第2銀主。所以做財務公司都好煩，好多時收唔返筆錢。了解左之後就唔理啦，我又唔係要買呢到。咁我衝去睇下個景啦最緊要。嘩，個景真係好唔錯，好開揚，對住個綠色既球場。打開窗仲有陣陣微風，我同YY好中意。咁我再望一望冇得睇樓個棟……咦？個棟樓前面有第二棟樓對住，但就矮少少，好有機會樓望樓喎。問下阿蘇，佢梗係話目標單位係望得過前面棟樓啦，不過agent 講的野……唔可信呢。佢開個價錢係正常，但冇樓睇的話，應該要平D，因為要預埋裝修錢……無得睇樓喎，點知入面D裝修會唔會又殘又舊又漏水ga！ 咁我返屋企諗完叫阿蘇幫我講一個價錢，阿蘇竟然一口拒絕！！佢話：「唔得呀Karma，之前都有客講過呢個價錢，無得傾呀。」我真係有D嬲，試都唔試下就話唔得？有無搞錯。本來諗住放棄，但佢不斷咁遊說我話層樓點好點好，唔買就遇唔到ga 啦。年少無知既我，就咁比佢搞到我幾晚訓唔著。其實我知樓價黎緊會升，今年年初已經跌到低位，依家再唔買就唔知等幾時啦……所以個幾日真係超級煩惱！最衰冇得睇下，唔知會唔會樓望樓，睇一睇確認到個景觀我就可以放心咁買。YY係呢個時候幫我搵到佢個炒家朋友基仔，同佢講完個情況之後，基仔既分析係:「老實講，層樓就唔係特別平，仲要冇樓睇。咁啦，你叫agent同個租客講話比$1000開門利是，冇理由咁都唔肯既。」……點知事實真係唔肯！！我真係好絕望……唯有放棄吧啦，硬係有D覺得買唔過既感覺。同時我都覺得阿蘇好唔幫得手！決定聯絡下其他agents！(待續……)
