最近鼓起了我最大的勇氣，辭左職。好多人都問，辭職後去邊？我人生中最型的一刻就發生了，我答：「冇地方去，休息下先。」老實講，大家的驚訝眼神真係令我有D沾沾自喜。乜真係咁特別咩？相信依家好多八十九十後都會咁，有人做左7、8年野辭職後一個人去印度添啦，一個女仔喎，我真係唔敢囉老實講……又有人做左20年野無端端走去日本住+玩，超型！所以我想講嘅係，祼辭，真係普通過餐蛋麵。 就係咁，我喺大家的驚嘆聲中退落黎，真正咁休息下。當然我唔係冇野做，我仲有層樓要裝修要租俾人( 買樓加借銀行錢的故事峰迴路轉，下次寫諞心得）、我仲要考試、我仲想真真正正寫下blog、我仲有最大的重任—養好自己的身體。無停的工作加壓力令我健康急速變差，周身唔舒服。決心要做好瑜珈+鍛練背肌（改善脊椎毛病），最緊要放慢心情，我最希望我嗰腦唔好諗咁多野! 所以我想講嘅係，如果你好想裸辭，首先你要： 1） 最重要- 衡量自己經濟狀況！如果平日三餐都唔肯定有冇得食既話就真係無辦法啦…要計下辭職後自己既錢可以生活到幾耐，呢樣好緊要。如果唔係辭左職後會好傍偟，分分鐘仲緊張過返緊工。 2）份工係咪嚴重影響生活- 好似我咁，嚴重咁影響到我健康，咁真係值得停一下。 3） 要諗清楚辭職後有咩做- 雖然話休息，但都最好訂位目標（例如要去學D野、去旅行…etc.) 。如果唔係，辭職後會變得好冇方向。 希望諗緊祼辭既你，衡量清楚後可以鼓起勇氣咁辭左佢啦！！我相信係值得為左自己，抖一抖。
