尋日放工後趕去書展，見有些肚餓，唯有食個快靚正晚餐。金鐘選擇唔多，經過一風堂，見到有新限定推介同檬面超人，就走去睇下有咩料到。 近期一風堂攪crossover 推出左個龍蝦x豚骨拉麵同一系列全新菜式。為咗個龍蝦豚骨拉麵，一風堂印製咗一本檬面超人書仔，主要介紹一風堂嘅資料同埋幪面超人，書仔後面仲教你點將筷子套摺成紙龍蝦，幾有創意。 龍蝦豚骨拉麵一上枱就聞到好香龍蝦味，濃郁嘅龍蝦湯底配上開邊龍蝦、半隻半熟蛋、蔥絲同埋一隻炸蝦餃。開邊龍蝦食落鮮味十足，而且一早已經拆肉，岩晒嫌麻煩又想食啖啖龍蝦肉嘅你。另外，限定拉麵選用咗粗身拉麵，咬落比較煙韌彈牙。食到差唔多時，發現湯底香濃而又帶有鮮味嘅原因原來係加咗櫻花蝦，果真用料十足！ 如果覺得拉麵唔夠濃味，仲可以因應個人喜好加上蒜頭、 芽菜、同辣庵菜。 舊有嘅特制赤丸新味都不遜色。 明太子雞翼，一碟有兩隻，炸到金黃色仲要起埋骨，入面塞滿晒明太子， 最啱用黎伴酒或當餐前小食。 荔枝味赤乳酸梳打冰最啱而家炎炎夏日，成枝荔枝味雪條放入乳酸梳打冰度，帶甜嘅雪條同乳酸梳打即時黎咗個中和作用，甜酸變得岩岩好，飲完仲有透心涼嘅感覺。
