近期hkexpress又放左特價機票做宣傳，本人試咗大半晚都搶唔到，不過搶唔到平機票去台灣"覓食"唔緊要，因為聽聞西環早前開咗一間主打台灣小食嘅"阿元來了"，反正港鐵而家開咗條港島西線咁方便，一於走去試下。 行出港鐵站行大約5分鐘，不遠處就已經見到一堆霓虹燈寫住「阿元來了」同埋多款台灣出名小食。 係門口出面放咗張凳仔，上面有個紙盒放住舊五花腩壓住外賣單，旁邊仲有個台灣啤酒罐放鉛筆。想買外賣嘅朋友，記得自行感受一下五花腩x台灣啤啦！ 店內裝修設計主要以一些台灣懷舊裝飾為主。店內放置咗台灣夜市必有嘅燈箱、燈籠、啤酒磁石貼等裝飾物，加埋木枱木凳，感覺就好似真係去咗台灣咁。不過店內坐位唔係好多，仲有些有擠迫，所以大家出入都要互相遷就一下。 望住餐單心大心細咩都想食，最後叫左個必吃魯肉飯、鹽酥雞、鹵味拼盤、香菇肉羹再加埋個冬瓜茶。最可惜就係遲左去，蚵仔煎太受歡迎已經賣晒，唯有下次先再去試。 魯肉飯嘅豬腩肉細細粒，入口有即溶感覺，加上汁多又不油膩，細細碗，真係眨下眼就食哂，好想Encore 多碗呀！ 香菇肉羹米粉食落其實都算幾大碗，裡面有豬肉、台灣竹筍同香菇。有些似香港地道小食碗仔翅，不過就好味好多。湯底不錯，口感唔會有漿住嘅感覺，聞落去亦好香菇味，一啖米粉一啖湯幾正。 鹵味拼盤，每個拼盤都有啲唔同，可以自己去揀自己喜歡的那一盤，會有雞翼、鹵水蛋、豬耳、豬腸⋯⋯份量不多，做開胃小食不過不失。 鹽酥雞，雖然細細粒，但粉薄餡靚啖啖肉，岩岩炸起熱辣辣夠晒香口，必叫。 冬瓜茶唔會太甜，配香酥小食最岩，無咁熱氣。 店員話每隔一段時間就會轉下菜單，下次一定會再去試！ [[地址：西營盤第三街73號地下]] [[營業時間：星期二至日 11:00am-10:00pm //星期一休息]]
