我地住個間酒店係包早餐既，一早起身去食個靚早餐先！！ (早餐buffet: 7-10am) 好有童話feel既餐廳....有壁爐、蠟燭，加埋d聖誕裝飾，好襯呀！！ 餐廳門口 好有聖誕節feel!! 早餐buffet都算多野食，有煙三文魚、好多款芝士、肉丸、yogurt！！ 一定要提下大家，芬蘭既肉桂卷真係好好食架！喜歡肉桂既朋友一定要試！！好香既肉桂味加鬆軟既麵包，一流！！ 我家大少最喜歡食呢度既牛角包！ 食完個豐富既早餐就去朝聖啦~聖誕老人村..我地黎啦!! 去聖誕老人村既交通都算方便架...有架巴士可以係門口落車架...我地係酒店拎左8號巴士(去聖誕老人村)既時間表 大家要留意巴士既時間...走左一班就要凍住咁等車架啦 其實聖誕老人村唔係好大...4小時就可以行晒....但係就可以殺你個相機好多memory...因為個度實在太靚啦!!!!好似入左童話國咁!! 要踏入北極卷範圍啦!! 聖誕老人就住係入面啦!! 童話國 門前有一棵好大好靚既聖誕樹~ 掛滿國旗既聖誕樹 我地仲同左聖誕老人影相...不過呢...係唔可以用自己既相機影架...小精靈會幫你地影，影完要買相架！一場黎到…梗係要買返張留念！ 個到仲有reindeer sled玩...不過我地就冇玩啦！留返去saariselka玩雪橇狗拉車~ 聖誕鹿 係芬蘭好快就天黑架啦~大概下午2時太陽就開始下山....3點幾4點就黑晒!! 今日我地就去左全球最北既麥當勞食下午茶...順便拎埋名信片 全世界最北既麥當當！ 芬蘭既麥當勞好貴呀！一個餐要9 EURO....size同香港唔差得好多！ 今日比琴日仲凍左，食完麥當勞行左一陣就返酒店啦！聽日一早就北上Inari追極光！！
