Day3 第三日去嘅地方充滿romantic！非常適合情侶，不過我今次係同fd去都覺得好正啊，正所謂︰「那些年錯過的大雨，那些年錯過的愛情......」白痴完，講番個行程先XD！ 首先一樣係酒店食完早餐8點幾就出發去第一個目的地︰淡水！ 淡水係台北新北市一個區，幾乎係台灣最北嘅地方，風景靚之餘，景點都唔少！一到左淡水站出站左手邊就已經可以見到個海！ 淡水站！ 海邊仲有唔少長凳可以坐住望風景，情侶最適合拍拖位！ 淡水比我嘅感覺就真係"好台灣"，旺中帶靜，淡水老街有唔少台灣特色小店，沿著海邊走更加可以一覽對岸嘅景色！之後我地仲去左好出名嘅阿婆鐵蛋買手信(有大or細粒嘅揀，我每樣買左兩包)，之後上山去食阿給！ 好有藝術氣氛嘅一條街(就係阿婆鐵蛋間舖對面)，香港真係未見過，呢d就係真正(有台灣特色)嘅街頭藝術！ 上到去，終於搵到lunch嘅目的地︰老牌阿給！無錯，間嘢店如其名，真係老牌食店，而且更加係阿給嘅始創店，所以嚟淡水食名物"阿給"，一定嚟呢間！！至於"阿給"係咩?就係由油豆腐做外皮，包住d浸過滷汁嘅炒冬粉，再用魚漿封口蒸熟，之後加d台灣甜辣醬，就成為下圖呢個樣啦，唔係講笑，阿給真係超過好味！！！個人而言要我拎台灣最出名嘅牛肉麵同佢比，我一定揀佢！而且一個只係35蚊台幣，我total叫左兩個再加杯豆漿！爽啊！ 淡水阿給，讚啊！ 之後再上去睇下台灣學校，因為山上有齊台灣嘅大、中、小學，我去嘅時候係6月，仲有好多學生返學，佢地d校服真係個個刻哂自己個名，作為香港人真係感覺好特別XD！(相就無影啦，費事跟住佢地，一陣比人以為我係拐子佬就死啦哈哈) 下晝就由山腳搭巴士去淡水最浪漫嘅地方︰淡水漁人碼頭！當日去意外地情侶唔多(我地咪其中一份子囉sosad)，可能係閒日啦，不過條橋真係好靚，由下圖嘅位置過到橋嘅另一面，又有唔少長凳等住一眾情侶去排排坐，食果果(真係周到..)，叫得漁人碼頭，其實就唔係得座橋啦，就算唔係情侶，呢度一樣值得去下，因為係漁人碼頭巴士總站旁有個室內市場，有賣當地漁民製作嘅海鮮類乾貨，買手信一流！ 情侶影相位，大大個Love！ 完成淡水嘅行程，就出發去下一個目的地︰十份！ 當時正值"那些年"熱潮，加上搭小火車、行火車軌、放天燈呢d都係相當新鮮嘅體驗，所以可以話係台北必到景點之一！ 瑞芳站內，好多相睇！ 去十份其實都幾遠，要先由台北車站搭火車(唔係捷運，真係要排大隊買飛...)去瑞芳站，再轉小火車先至到！ 上小火車啦！ 小火車內觀！ 搭左幾個站就到啦！(由火車到小火車沿途有好多風景睇XD) 一出嚟見到有人賣芋頭冰，夏天啱哂！ 唔知係呢個郵筒寄告白嘅明信片/情信係咪就會得到幸福呢哈哈！(講笑講笑...) 小火車未到，任行任影XD(好那些年...) 嚟到十份，當然要許個願(其實係大大隻字寫上去)，放天燈啦！ 十份有條吊橋，係吊橋上睇風景一流！ 由於小火車班次唔多，所以玩到傍晚我地就回程啦！返到瑞芳，我地唔急住返歸，決定係瑞芳行一轉！結果行到咁上下，就係瑞芳嘅美食街解決夜晚果餐，食左個牛肉麵同生煎包，非遊客區食嘢其實都唔錯啊！ 食完就搭火車返去啦，原來台灣火車都有分快、慢唔同車種，由於時間關係，緊係有車就上啦，去果程本身係搭慢車，所以唔洗補票，但返果程坐左架快車(其實都真係快幾多)，要係出站前補返個差價(又識多左樣嘢)！ 今日嘅行程就咁完啦，待續...
