Day2 第二日行程比較多，日頭主要係睇動物&風景，朝早8點係酒店(酒店包左3日早餐@酒店內嘅餐廳，係自助早餐嚟，任食任飲，而且都幾多選擇，唔錯！)食完早餐就出發搭捷運去動物園站，1號出口出直行即到台北市立動物園門口，60蚊台幣入場費，即係十幾蚊港紙，其實好抵，因為動物園面積都幾大，仲要幾乎咩動物都有得睇，好似樹熊，企鵝，袋鼠，熊貓(比海洋公園睇近距離好多！) 門口影相位！(註︰入左動物園之後仲有間7-11可以買嘢) 好難得影到佢企起身一刻！ 行到差唔到中午就去左熊貓館睇熊貓，順便係佢館內以熊貓做主題嘅餐廳食lunch，叫左個200蚊台幣set lunch，雞肉芝士飯X焦糖瑪奇朵，印象中兩樣都好好味，物有所值！ 參觀完哂都差唔多3點，就係動物園園內搭貓空纜車上貓空啦！貓空其實係山上嚟，係台灣好出名嘅茶山區，上到去可以見到好靚嘅風景(無落雨的話)，我就無咁好彩，果日下晝開始一直有毛毛雨，個景就真係唔多清，但d霧景feel都幾正嘅(自我安慰)！ 準備上纜車！ 係貓空除左可以品茶，仲有d地道小食嘅店舖，我地就係果度食左幾樣出名地道小食(如下圖) 左面係黑糖刨冰，中間係蚵仔煎，右面係盬酥雞 係貓空逗留左2個鐘，就搭纜車返動物園站，出發去下一個目的地︰台北地下街！ 由動物園返到去台北車站，時間都只不過係傍晚，台北地下街其實就係台北車站旁，出閘跟指示好快就到！台北地下街真係幾平民化(似西洋菜街)，有街頭樂隊表演，有各種各樣嘅賣衫賣飾物嘅小店，書店，而且連mk必備嘅動漫、女僕cafe都有！ 一到達就見到有人表演緊！ 係地下街當然都有食嘅地方啦，由於夜d要去士林夜市掃街，所以係度本身無打算食嘢，不過行行下見到一間超平魯肉飯，5蚊左右港紙一碗(如下圖)，唔試都對唔住自己啊！雖然碗飯真係得魯肉同飯，但味道一d都唔差啊，5蚊一碗飯，心諗係香港絕對係impossible... 超平民抵食魯肉飯！ 未到8點即轉戰期待已久嘅︰士林夜市！！！看圖不解釋！最like係大腸包小腸&胡椒餅，大滿足！ 點擊圖片放大 +2 大腸包小腸！好想係香港再食到！！！ 由於行夜市行到忘哂形，回程時原來捷運已經無車，結果搭的士返歸啦...第一次搭台灣的士，即刻遇到個超nice嘅司機，沿途一路係咁介紹台灣景點同佢自己推介嘅地道餐廳，真係獲益唔少，尤其係佢同我地講去台北夜市記得至少去一次寧夏夜市，最地道X最多古早味，仲話比我地知寧夏夜市係全台北第一個夜市！哈，全程同佢傾計超開心XD，又係一次好好嘅經歷，而且再一次感受到台灣人嘅好客，讚！ 落車點我地選擇左係西門町入口，因為差唔多凌晨，果度無人咁濟，我地專登試下行一次無人嘅西門町兼影下相！嘩！平時多人到爆嘅西門町，突然變左得我地(其實仲有一、個做清潔嘅)，感覺好正！ 返到酒店門口，諗返起唔記得幫佢影番張相！我地間酒店係內連7-11，買嘢超方便，而且台灣d便利店飲品勁平，一支500毫升嘅茶價錢幾乎係香港嘅一半... 第二日咁就完啦，待續...
